Ushbu haftada O‘zbekistonning barcha hududlarida havo harorati fevral oyining ikkinchi yarmi uchun me’yoriy qiymatlaridan 13-17 darajaga yuqori bo‘lgan juda iliq bahoriy ob-havo kuzatildi. “O‘zgidromet”ning yozishicha, 16-fevraldan 18-fevralgacha bo‘lgan davrda maksimal harorat ba’zi joylarda shu kunlarning ko‘p yillik rekordidan oshdi.
18-fevralda kunduz kuni havo 25-28 darajagacha, janubda 30-32 darajagacha isidi. Bu meteorologik kuzatuvlarning butun davri davomida 18-fevral kuni uchun eng yuqori harorat qiymatlaridir.
19-fevral kuni ob-havo o‘zgara boshladi, osmonni zich bulutlar qopladi, shimoli-g‘arbiy hududlarda qorga aylanadigan yomg‘irlar boshlandi. “Ob-havo o‘zgarishiga bugun mamlakatimizga Kavkaz hududlaridan kirib kelayotgan sovuq va nam antisiklon sababchidir”, — deb izoh bergan “O‘zgidromet”.
Qayd etilishicha, kun davomida respublikaning barcha hududlarida ba’zi joylarda yomg‘ir, shimolda qor yog‘adi. Faqat Surxondaryo, Andijon, Namangan, Farg‘ona viloyatlarida yog‘ingarchilik bo‘lishi ehtimoli kamroq. Ba’zi joylarda shamol 17-22 metr/sekundgacha kuchayadi, ba’zida esa 25-30 metr/sekundgacha kuchayishi mumkin. Havo harorati 15-20 daraja iliq atrofida bo‘ladi, shimolda 0-5 daraja iliqdan oshmaydi.
Dam olish kunlarida antisiklon ta’siri saqlanib turadi, respublika bo‘yicha vaqti-vaqti bilan yomg‘ir yog‘adi, ba’zi joylarda kuchli bo‘lishi mumkin. Qoraqalpog‘istonda, Xorazm, Buxoro, Navoiy viloyatlarida yog‘ingarchilik kutilmaydi. Havo harorati kechalari 2-7 daraja iliqqacha, kunduz kunlari 8-13 daraja iliqqacha pasayadi. O‘rtacha kecha-kunduzlik havo harorati me’yorga yaqinlashadi.
O‘zbekistonning tog‘li hududlarida qor ko‘chishi xavfi saqlanib turadi.
Avvalroq “O‘zgidromet” O‘zbekistonda haftaning ikkinchi yarmidan havo harorati pasayib, yog‘ingarchilik bo‘lishi kutilayotganini, hafta oxiriga borib esa qor aralash yomg‘ir yog‘ishi mumkinligini ma’lum qilgandi.
Izoh (0)