Tor bichimdagi jinsi shimlarni qanday ustki kiyimlar bilan uyg‘unlashtirish mumkin? (foto)

Moda namoyishlarida ushbu mavsum uchun keng bichimdagi shimlarni kiyish tavsiya etilsa-da, ammo hamma ham bunga amal qilavermaydi. Balki, tor bichimdagi shimlardan voz kechish oson emasdir. Shuning uchun ularga ushbu mavsumda ham trendda bo‘lish uchun tor jinsi shimlarni nimalar bilan uyg‘unlashtirish mumkinligini ko‘rib chiqamiz.

Tor va to‘g‘ri bichimdagi jinsi shimlar badanga yopishib turuvchi koftalar bilan mos keladi. Agar koftalar shifon yoki harir matosidan bo‘lsa, bu yanada yaxshi. Ayniqsa, koftalar dizaynida bo‘yin qismi chuqur to‘rtburchak shakldagilari ajoyib obraz yaratadi.

Yupqa va tor shim keng bichimdagi kostyumlar bilan navbatdagi ajoyib ko‘rinishni hosil qiladi. O‘rtacha uzunlikdagi kostyumlar jinsi shimlar bilan uyg‘unlashib, oyoqlarni vizual tarzda ingichka va uzun ko‘rsatadi. Ushbu to‘plam uchun, albatta, poshnali poyabzal kiyish tavsiya etiladi.

Ushbu klassik uslub hech qachon urfdan qolmaydi. Kombinatsiya uchun qora yoki to‘q ko‘k rangdagi jinsilarni tanlash mumkin. Ular bilan charm etik,  yupqa sviter hamda tirsak qismi yamoqli pidjak yaxshi obraz yarata oladi.

To‘q rangdagi jinsi shimlar “granj” uslubini yoqtiruvchilar uchun mos keladi. Ularni botinka va old qismi ochiladigan koftalardan tortib, charm kurtka yoki klassik paltoga qadar birlashtirish mumkin.

Ochiq rangdagi biroz kengroq shimlarni botinkalar ichiga kiritish bilan tajriba qilish mumkin. Sviter, ko‘ylak va klassik uslubdagi kostyumlar ajoyib qarama-qarshilikni keltirib chiqaradi. Shuningdek, qomatdagi kamchiliklar ham o‘z-o‘zidan berkitiladi.

To‘g‘ri bichimdagi shimlar oversize koftalar va paltolar bilan ajoyib asosni hosil qiladi. Buning uchun och kulrang va jigarrang paltolarni tanlagan ma’qul. Shuningdek, chiroyli ko‘rinish uchun zargarlik buyumlaridan ham foydalanish mumkin.