Samarqand viloyatining Payariq tumanida IIB boshlig‘i o‘rinbosariga pora bergan fuqaroga jinoyat ishi qo‘zg‘atildi. Bu haqda “Daryo”ga viloyat IIB axborot xizmati ma’lum qildi.
Ma’lum bo‘lishicha, 2021-yilning 15-fevral kuni Payariq tuman IIB Jinoyat qidiruv bo‘limi xodimlari 1992-yilda tug‘ilgan K.A.ning og‘ilxonasidan tarkibida oltin rudasi bo‘lishi mumkin bo‘lgan toshlar maydalanayotganini aniqlagan.
Fuqaro mazkur holatni rasmiylashtirmasdan, ishni o‘zining foydasiga ijobiy hal qilib berish hamda tarkibida oltin moddasi bo‘lishi mumkin bo‘lgan toshlarni o‘zida qoldirish evaziga tuman IIB boshlig‘ining birinchi o‘rinbosariga 5000 dollar pora taklif qilgan.
Xodim pora berish jinoyat ekanligi haqida K.A.ga bir necha marotaba tushuntirishiga qaramasdan, fuqaro tushlikdan so‘ng uning oldiga qaytib kelishini aytib ketgan. Tuman IIB boshlig‘ining birinchi o‘rinbosari holat yuzasidan viloyat IIB boshlig‘i nomiga bildirgi bilan murojaat qilgan.
Bildirgiga asosan, IIV O‘z xavfsizlik xizmatining viloyat bo‘yicha bo‘limi hamda tuman prokuraturasi hamkorligida o‘tkazilgan tezkor tadbirda, K.A. IIB xodimi bilan uchrashib, oldindan aytilgan 5000 dollarning 1500 dollarini pora tariqasida berayotgan vaqtida ashyoviy dalillar bilan ushlangan.
Holat yuzasidan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilgan.
Mavzuga doir:
- Buxoroda 23 sotix yerni rasmiylashtirishda yordam berish evaziga oldindan 100 dollar va 2 mln so‘m olgan kadastr xodimiga jinoyat ishi qo‘zg‘atildi
- Nukusda fuqaroni ichki ishlar tizimiga ishga kiritishni va’da qilib, undan 4,5 ming dollar olgan shaxs ushlandi
- Toshkentda YPX inspektorlariga jami 500 dollar pora taklif qilgan uch haydovchi ushlandi
Izoh (0)