Butun dunyoda COVID-19’ga chalinish bo‘yicha yangi holatlar soni ketma-ket beshinchi hafta kamayib bormoqda. Bu haqda Jahon sog‘liqni saqlash tashkiloti (JSST) bosh direktori Tedros Gebreyesusning bayonotiga tayanib, “RBK” xabar berdi.
“Oktabrdan beri o‘tgan hafta ilk marotaba haftalik infeksiya yuqtirish holati bo‘yicha eng past ko‘rsatkich qayd etildi”, — dedi Gebreyesus. Uning so‘zlariga ko‘ra, besh hafta ichida virus yuqtirish holati deyarli ikki baravarga kamaygan.
Fevral oyi boshida Gebreyesus mutatsiyalarni hisobga olgan holda infeksiya yuqtirish bo‘yicha yangi holatlar sonining kamayishi pandemiya tarqalishini boshqarishga imkon berishini aytgandi.
Oldinroq JSST mutaxassisi Mariya van Kerkxoven koronavirus tarqalish sur’ati pasayganini e’lon qilgandi. Shu bilan birga, u infeksiyaning oldini olish choralariga rioya qilishda davom etish zarur deb hisoblaydi. “Kasallikning pasayishi bir qator omillarga, birinchi navbatda, mamlakatlarning virus yuqish zanjirini uzishi hamda infeksiya tarqalishining oldini olish uchun foydalanadigan choralari bilan bog‘liq”, — degan u.
Yanvar oyida JSST sog‘liqni saqlash bo‘yicha favqulodda vaziyatlar dasturi direktori Maykl Rayan koronavirusni to‘liq mag‘lub etish qiyin bo‘lishini aytgan. U COVID-19 endemik kasallikka aylanishini istisno qilmagan, uning fikricha, virusni butunlay yo‘q qilish deyarli imkonsiz.
Shuningdek, tashkilotning Rossiyadagi vakili Melita Vuynovich COVID-19 virusi Yer sayyorasida abadiy qolishi mumkinligi, yuqori samarali vaksina uni butunlay yo‘q qilish uchun kafolat bermasligini aytgan.
Avvalroq Qo‘shma Shtatlarda COVID-19’ga chalinish holati va uning oqibatida kasalxonaga yotqizilayotganlar soni kamaygani haqida xabar qilingandi. Mamlakatda qurbonlar soni ko‘payishda davom etsa-da, o‘lim darajasi sekinlashmoqda.
Isroilda esa koronavirusning “britancha” mutatsiyasi tarqalishi orqali bolalar orasida virusga chalinish holati ikki yarim baravarga oshgan. Bu esa Isroilning yirik klinik markazlarida ixtisoslashgan pediatrik COVID reanimatsiya bo‘limlari ochilishini talab qilmoqda.
Izoh (0)