Space X bortida 60 ta sun’iy yo‘ldosh bo‘lgan raketani uchirdi (video)

Ilon Maskning SpaceX kompaniyasi 60 ta Starlink suniy yo‘ldoshiga ega Falcon 9 tashuvchi raketasini uchirdi, deb yozmoqda “RBK”. Uchish jarayoni korporatsiya saytida translyatsiya qilingan.

“Starlink dunyoning haligacha internetga ulanish muammoli bo‘lgan hududlari uchun juda mos keladi”, — deb yozilgan kompaniyaning Twitter’dagi sahifasida. Ushbu dastur butun dunyo bo‘ylab internet aloqasini yaxshilash va kengaytirishga qaratilgan.

https://twitter.com/SpaceX/status/1361526004695527424

Ilon Maskning kompaniyasi 2020-yil dekabrida Starlink loyihasi doirasida olis va qishloq joylarini sun’iy yo‘ldosh interneti bilan ta’minlash uchun AQSh hukumatidan 885,5 million dollar subsidiya olishi ma’lum bo‘lgan edi. SpaceX’ga mablag‘lar o‘n yil mobaynida har oy berib turiladi. Bundan tashqari, AQSh hukumati kompaniyaga mamlakatning 35 ta shtatida 642 925 ta nuqtada internetni ta’minlash xizmatlarini ko‘rsatish uchun qo‘shimcha pul ajratadi.

Avvalroq SpaceX kompaniyasiga tegishli Falcon 9 tashuvchi raketasi 60 ta Starlink kommunikatsiya sun’iy yo‘ldoshlarining navbatdagi guruhi bilan orbitaga muvaffaqiyatli uchirilgan edi. Parvoz 4-fevral kuni Toshkent vaqti bilan 11:19 da Floridadagi Kanaveral burnidan amalga oshirilgan.

Keyinroq uning ko‘p martalik birinchi pog‘onasi Of Course I Still Love You (“Albatta, seni hali ham yaxshi ko‘raman”) suzuvchi platformasiga muvaffaqiyatli qo‘ngan.

3-fevral kuni esa SpaceX kompaniyasi tomonidan Oy va Marsga parvoz qilish uchun ishlab chiqilgan Starship kosmik kemasi prototipi AQShning Texas shtatida o‘tkazilgan sinovlar chog‘ida, qo‘nish vaqtida portlab ketgan.

Eslatib o‘tamiz, 23-yanvar kuni esa SpaceX Falcon tashuvchi raketasini 143 ta sun’iy yo‘ldosh bilan uchirib, bitta raketada uchirilgan sun’iy yo‘ldoshlar soni bo‘yicha jahon rekordini yangilagan.