Antarktidada Ukrainaning “Akademik Vernadskiy” stansiyasi atrofida olimlar qor “gullagani”ni aniqladi — u odatdagidek oq rangda emas, balki pushti va yashil tusga kirgan. Bu haqda Ukraina Milliy Antarktida ilmiy markaziga tayanib, “RBK” xabar bermoqda.
“Qorda mikroskopik suv o‘tlari o‘sishi tufayli shunday rang paydo bo‘ladi. Ular o‘ta past haroratga chidamli bo‘lgan sporalar bilan ko‘payadi va butun qish davomida qorda saqlanadi”, — deyiladi xabarda.
Qorga xlorofill pigmenti yashil rang bersa, mikroskopik suv o‘tlarining ba’zi turlari tarkibiga kiruvchi karotin uni pushti rangga bo‘yaydi, deya ilmiy markaz aniqlik kiritgan.
Olimlarning so‘zlariga ko‘ra, qorning “gullashi” iqlim o‘zgarishi uchun imkoniyat yaratadi, chunki shunday tusga kirishi tufayli qor quyosh nurini kamroq aks ettiradi va tezroq eriydi.
Markazdagilarning eslatishicha, o‘tgan yili Antarktidada qorning pushti tusga kirishi dunyo hamjamiyati e’tiborini tortgan. Kembrij universiteti olimlari Ukraina Milliy Antarktida ilmiy markazida birgalikda tadqiqot olib borib, Antarktida maydonining qancha qismi rangli qor bilan qoplanayotganini aniqlashni taklif qilgan.
Eslatib o‘tamiz, 2020-yil bahorida Kembrij universiteti va Britaniya Antarktika xizmati olimlari, taxminan, ikki kvadrat kilometr maydonda deyarli 1700 alohida suv o‘tlari gullash o‘choqlarini topgan edi.
Izoh (0)