Isroil hukumati koronavirus cheklovlaridan bosqichma-bosqich chiqish bo‘yicha qaror qabul qildi. Yaqin vaqt ichida mamlakatning Tel-Avivda joylashgan asosiy aeroporti ishini qayta boshlaydi, COVID-19’ga qarshi vaksina qabul qilganlar butunlay erkin bo‘ladi. Bu haqda “Komsomolskaya pravda” xabar berdi.
Ben Gurion nomidagi Tel-Aviv aeroporti 20-fevralda o‘z ishini qayta boshlaydi. Boshida tashrif buyuruvchilarning soni kuniga 2000 nafarni tashkil qiladi. Hukumatning ma’lumot berishicha, bu vaqtinchalik ehtiyot choralari uzoq davom etmaydi va tez orada aeroport bor imkoniyati bilan ishga tushadi.
2021-yilning 26-yanvar kuni Isroilda havo qatnovi to‘xtatildi — mamlakatdan chiqib ketishga ham, kirib kelishga ham taqiq qo‘yildi. Isroilliklarni boshqa mamlakatdan olib keluvchi reyslar bundan mustasno edi.
Shuningdek, Isroil Vazirlar Mahkamasining pandemiyaga bag‘ishlangan majlisida emlangan fuqarolardan deyarli barcha cheklovlar olib tashlanishi haqida qaror qabul qilindi. Ular endi muzey va ko‘rgazmalarga, sport va madaniy tadbirlarga, savdo markazlari va mashg‘ulot zallariga tashrif buyurishi mumkin.
Mamlakatning ochilish sanasi masalasida vazirlar bir to‘xtamga kela olmadi. Bu 7—10 kun ichida sodir bo‘lishi kerak. Yakuniy qaror tez orada qabul qilinadi.
Izoh (0)