Qozog‘iston Qarag‘anda farmatsevtika kompleksida (QFK) ishlab chiqarilgan “Sputnik V” vaksinasini ro‘yxatdan o‘tkazdi. Bu haqda kompaniya matbuot xizmatiga tayanib, “RIA Novosti” xabar berdi.
“Qarag‘anda farmatsevtika kompleksi Qozog‘iston Respublikasi hududida koronavirus infeksiyasiga qarshi ‘Gam-COVID-Vac’ (‘Sputnik V’) vaksinasini ro‘yxatdan o‘tkazish jarayonini yakunladi”, — deyiladi QFK press-relizida.
Xabarda aytilishicha, 13-fevral kuni Qozog‘iston Sog‘liqni saqlash vazirligining ekspert tashkiloti tomonidan ro‘yxatga olishga oid materiallarini ko‘rib chiqish natijalari bo‘yicha emlashning xavfsizligi, sifati va samaradorligi to‘g‘risida xulosa qilingan. Ushbu xulosa asosida Sog‘liqni saqlash vazirligining Tibbiyot va farmatsevtika nazorati qo‘mitasiga ro‘yxatdan o‘tish guvohnomasini olish uchun ariza yuborilgan.
Avvalroq Qozog‘istonda 1-fevraldan Rossiyada ishlab chiqarilgan “Sputnik V” vaksinasi yordamida koronavirusga qarshi emlash boshlangani haqida xabar berilgandi. Mamlakatga vaksinaning birinchi partiyasi bir martalik import ruxsatnomasi asosida yetkazib berilgan.
QFK rus komponentlaridan foydalanib, “Sputnik V” vaksinasini ishlab chiqarishni boshladi. Dastlabki hisob-kitoblarga ko‘ra, 2021-yil fevral oyi oxirida mamlakatning barcha hududlariga QFK tomonidan ishlab chiqarilgan “Sputnik V” vaksinasining, taxminan, 90 ming dozasini yetkazib berish rejalashtirilgan.
Bundan tashqari, 2021- yilning 2-choragidan boshlab Qozog‘istonda ishlab chiqarilgan QazCovid-in preparatidan koronavirusga qarshi emlash uchun foydalanish rejalashtirilgan, mazkur preparat hozirda klinik sinovlarning uchinchi bosqichidan o‘tmoqda. Yanvar oyi oxirida sog‘liqni saqlash vazirining birinchi o‘rinbosari Marat Shoranov koronavirusga qarshi emlash hamma uchun bepul ekanini, aholining xavf ostida bo‘lmagan qismi uchun vaksinatsiya aprel—may oylarida amalga oshirilishini e’lon qilgan.
Eslatib o‘tamiz, Qozog‘istonda koronavirusga chalinganlar soni 200 ming nafardan oshgan. Mamlakatda pandemiya boshidan beri 3 mingdan ortiq odam koronavirus qurboni bo‘lgan.
Izoh (0)