Исроил ҳукумати коронавирус чекловларидан босқичма-босқич чиқиш бўйича қарор қабул қилди. Яқин вақт ичида мамлакатнинг Тель-Авивда жойлашган асосий аэропорти ишини қайта бошлайди, COVID-19’га қарши вакцина қабул қилганлар бутунлай эркин бўлади. Бу ҳақда «Комсомольская правда» хабар берди.
Бен Гурион номидаги Тель-Авив аэропорти 20 февралда ўз ишини қайта бошлайди. Бошида ташриф буюрувчиларнинг сони кунига 2000 нафарни ташкил қилади. Ҳукуматнинг маълумот беришича, бу вақтинчалик эҳтиёт чоралари узоқ давом этмайди ва тез орада аэропорт бор имконияти билан ишга тушади.
2021 йилнинг 26 январь куни Исроилда ҳаво қатнови тўхтатилди — мамлакатдан чиқиб кетишга ҳам, кириб келишга ҳам тақиқ қўйилди. Исроилликларни бошқа мамлакатдан олиб келувчи рейслар бундан мустасно эди.
Шунингдек, Исроил Вазирлар Маҳкамасининг пандемияга бағишланган мажлисида эмланган фуқаролардан деярли барча чекловлар олиб ташланиши ҳақида қарор қабул қилинди. Улар энди музей ва кўргазмаларга, спорт ва маданий тадбирларга, савдо марказлари ва машғулот залларига ташриф буюриши мумкин.
Мамлакатнинг очилиш санаси масаласида вазирлар бир тўхтамга кела олмади. Бу 7—10 кун ичида содир бўлиши керак. Якуний қарор тез орада қабул қилинади.
Изоҳ (0)