Фарғонада 600 ўринли тўйхона савдо мажмуасига айлантирилди

Фарғона вилояти Тошлоқ туманидаги 600 ўринли тўйхона савдо мажмуасига айлантирилди, дея хабар бермоқда ЎзА.

Маълум қилинишича, Фарғона вилояти, Тошлоқ туманида яшовчи тадбиркор Салимжон Қодиров бундан бир неча йил илгари туман марказида 600 ўринли «Оқ олтин» тўйхонасини барпо этган.

Пандемия даврида тўйлар ихчамлаштирилиб, катта ҳажмдаги тўйхоналар фаолиятига эҳтиёж камайгани боис тадбиркор мажмуани бошқа мақсадлар учун ўзгартиришга киришди.

Қайд этилишича, собиқ тўйхонада 50 та савдо нуқтаси, ёшлар учун ўқув маркази ташкил қилинди. Мажмуа ташқарисида хизмат кўрсатиш шохобчалари қурилди.

Тадбиркор, шунингдек, туманда чорвачиликка ихтисослашган «Мухтора МЗХМ» фермер хўжалигини ташкил этган. Хўжаликнинг қайта ишлаш цехида 10 турдаги сут ва гўшт маҳсулотлари тайёрланяпти. Шунингдек, бу ерда наслчиликни ривожлантиришга ҳам алоҳида эътибор қаратилган. Чорва комплексига Германия ва Австриядан зотли моллар келтирилиб, кўпайтирилмоқда.

Бундан аввал Корхоналарни соғломлаштириш марказига айлантириладиган «Наврўз» тўйхонасининг 1-қаватида ишсизларга ёрдам кўрсатилиши ҳақида хабар берилганди.