“Yangi yil bo‘lsa, Qashqadaryodan tandir, Xorazmdan guruch keladi” – Adliya vaziri jamiyat rivojlanishiga salbiy ta’sir ko‘rsatuvchi milliy an’analar haqida

Adliya vaziri ishtirokida 15-fevral kuni o‘tkazilgan matbuot anjumanida Ruslanbek Davletov jamiyat rivojlanishiga to‘sqinlik qiladigan milliy an’analardan voz kechish kerakligini ta’kidladi, deya xabar bermoqda “Daryo” muxbiri Mirolim Isajonov.

“Bizda shunday odat borki, yangi rahbar ishga kelganidan keyin darrov o‘z xonasini yoki tashkilot binosini ta’mirlashdan boshlaydi, katta-katta pullarni xarajat qiladi. Mana, xizmat mashinalarining xarajati bo‘yicha qanday muammolar tug‘ilyapti?! Chet elga yoki viloyatlarga qilingan safarlarning u yerdagi xarajatlarini kim qoplaydi? Bizning qadriyatlarimiz, qandaydir an’analarimiz borki, mehmondo‘stlik deymiz, boshqa deymiz. Sovg‘alar berishni juda yaxshi ko‘rishadi bizdagi insonlar. Yangi yil bo‘lsa, hamma sovg‘a tashishni boshlaydi. Bu yil ham xuddi shuni kuzatdik. Qashqadaryodan tandir keladi, Xorazmdan guruch keladi, hamma yoqda shu jarayon bo‘lib ketadi.

Shuni alohida qayd etish kerakki, milliy an’analar jamiyat rivojlanishiga to‘sqinlik qilarkan, bu an’analardan, albatta, voz kechish kerak. Rivojlanishga ta’sir qilyaptimi, yillar davomida shakllangan an’anami, baribir voz kechishimiz kerak. Qadriyat bo‘lsa ham, madaniyat bo‘lsa ham, voz kechish kerak, deb o‘ylayman. Mehmondo‘stlik, o‘zbekchilik, degan gaplar ko‘pincha salbiy ma’noda ishlatilayotgan holatlar kuzatilyapti. Aslida, o‘zbekchilikning zamirida beg‘ubor g‘oyalar yotishi kerak. Jamiyatimizga xos bo‘lmagan odatlardan voz kechishimiz zarur”, — dedi Davletov.