O‘zbekistonda anomal issiq havo hafta oxiriga borib keskin o‘zgaradi, qor aralash yomg‘ir yog‘ishi kutilmoqda
15-fevral kuni O‘zbekistonga Eron hududlaridan iliq va quruq havo kirib kelishi davom etadi. Harorat foni iqlim me’yorlaridan 8-10 darajaga yuqori bo‘ladi va 15-20 daraja iliq, janubda 22-27 daraja iliq atrofida bo‘ladi, deb xabar bermoqda “O‘zgidromet”.
16-fevraldan 18-fevralgacha Eron hududlarining janubidan juda iliq havo kirib kelishi kuchayadi. 18-fevral kuni eng issiq kun bo‘lishi kutilmoqda. O‘rtacha kecha-kunduzlik havo harorati me’yordan 13-15 darajaga yuqori bo‘ladi va meteorologik kuzatuv davri uchun shu kunlarning mutlaq qiymatlaridan ko‘p bo‘ladi.
Ish haftasining oxiriga kelib, ob-havo sharoiti keskin o‘zgarishi kutilmoqda. 18—19-fevral kunlarida bosim o‘zgarishida respublika bo‘yicha ba’zi joylarda shamol 17-22 metr/sekundgacha kuchayadi, 25-30 metr/sekundgacha kuchayishi ham mumkin.
Haftaning oxiriga kelib respublika bo‘yicha yomg‘ir yog‘adi, shimolda yomg‘ir qor aralash yog‘adi. Tog‘li hududlarda yog‘ingarchilik kuchli bo‘ladi.
