O‘zbekiston Prezidenti 12-fevral kuni Jinoyat va Jinoyat-protsessual hamda Ma’muriy javobgarlik to‘g‘risidagi kodekslarga o‘zgartirish va qo‘shimchalar kiritish to‘g‘risidagi qonunni imzoladi. “Xalq so‘zi” gazetasida e’lon qilingan hujjatda voyaga yetmaganlarga nisbatan amalga oshirilgan qator jinoyatlar uchun to‘g‘ridan to‘g‘ri jinoiy javobgarlik belgilangan.
Qonun bilan Jinoyat kodeksiga kiritilgan qo‘shimchalarga ko‘ra, 16 yoshdan 18 yoshgacha bo‘lgan shaxsning 18 yoshga to‘lmaganligi aybdorga ayon bo‘lgani holda uni mulkiy manfaatdor etish orqali u bilan jinsiy aloqa qilganlik uchun jinoiy javobgarlik belgilandi.
Ushbu jinoyatni sodir etgan shaxsga 2 yilgacha ozodlikdan mahrum qilish jazosi qo‘llanilishi mumkin.
Shuningdek, voyaga yetmagan shaxsni g‘ayriqonuniy jamoat birlashmalari va diniy tashkilotlar, oqimlar, sektalar faoliyatida qatnashishga undaganlik uchun jinoiy javobgarlik belgilangan. Ushbu jinoyatni sodir etgan shaxsga 3 yildan 5 yilgacha ozodlikdan mahrum qilish jazosi qo‘llanilishi mumkin.
Bundan tashqari, qonun bilan Ma’muriy javobgarlik to‘g‘risidagi va Jinoyat kodekslariga kiritilgan o‘zgartirishlarga ko‘ra voyaga yetmagan shaxsni mehnatga biror-bir shaklda ma’muriy tarzda majburlagan shaxs to‘g‘ridan to‘g‘ri jinoiy javobgarlikka tortilishi belgilandi (ilgari ma’muriy jazo qo‘llanilgandan so‘ng takror sodir etilgan taqdirda jinoiy javobgarlik belgilangan). Endilikda bu kabi jinoyatlar uchun BHMning 150 baravaridan 200 baravarigacha yoki 3 yilgacha ma’lum huquqlardan mahrum etish yoki 3 yilgacha axloq tuzatish ishlariga jalb etish jazosi tayinlanadi.
Avvalroq O‘zbekistonda ommaviy tartibsizlikka da’vat qilganlik uchun ham jinoiy javobgarlik belgilanishi kutilayotgani to‘g‘risida xabar berilgandi.
Izoh (0)