Navoiyda 15 bosh qo‘y go‘shtini veterinariya-sanitariya qoidalari talablariga zid ravishda Toshkentga sotish uchun olib ketayotgan Cobalt haydovchisi jarimaga tortildi. Bu haqda IIV PPX va JTSBB axborot xizmati xabar berdi.
Ma’lum qilinishicha, 13-fevral kuni Navoiy viloyati Karmana tumanida joylashgan “Samarqand” YPX maskanida Buxoro—Toshkent yo‘nalishi bo‘ylab harakatlanib kelayotgan Cobalt avtomobili to‘xtatilgan. 38 yoshli R.P. boshqaruvidagi yengil avtomobil Navoiy viloyati IIB PPX va JTSB Karantin tadbirlarini ta’minlash bo‘linmasi xodimlari tomonidan tekshirilganda uning saloni va yukxonasida 15 bosh qo‘y go‘shti aniqlangan. Haydovchi ushbu go‘shtlarni veterinariya-sanitariya qoidalari talablariga zid ravishda Toshkent shahriga sotish maqsadida olib ketayotgan bo‘lgan.
Veterinariya va chorvachilikni rivojlantirish boshqarmasi xodimi tomonidan fuqaro R.P.ga nisbatan Ma’muriy javobgarlik to‘g‘risidagi kodeksning 109-moddasiga asosan (veterinariya, veterinariya-sanitariya qoidalari va normalarini buzish) ma’muriy bayonnoma rasmiylashtirilgan.
Ma’lumot uchun, go‘sht va go‘sht mahsulotlarini tashish uchun mo‘ljallangan transportning poli va idishlari silliq, tozalash va dezinfeksiya qilish uchun qulay bo‘lishi, mahsulot sifati va iste’molchilar salomatligiga ta’sir ko‘rsatmaydigan materiallardan yasalgan bo‘lishi kerak. Barcha toifadagi hayvonlar so‘yilganidan so‘ng ularning go‘shti va boshqa mahsulotlarini veterinar ekspertizadan o‘tkazilishi shart.
Avvalroq Sirdaryoda iste’molga yaroqsiz deb topilgan 210 kilogramm go‘sht mahsulotlari yo‘q qilingani to‘g‘risida xabar berilgandi.
Izoh (0)