Peru tashqi ishlar vaziri Elizabet Astete 14-fevral kuni klinik sinovlar va milliy immunizatsiya dasturi boshlanishidan oldin Xitoyning Sinopharm kompaniyasiga tegishli vaksinaning birinchi dozasini qabul qilganini tan oldi va iste’foga chiqqanini aytdi. Bu haqda “Interfaks” xabar berdi.
“Men qanday xatoga yo‘l qo‘yganimni angladim va vaksinaning ikkinchi dozasini olmaslikka qaror qildim. Shu sababdan prezidentga iste’foga chiqish haqida ariza topshirdim”, — deb yozdi u Twitter sahifasida.
Astetening bayonotiga ko‘ra, dekabr—yanvar oylarida u koronavirus testi ijobiy natija bergan rasmiylar bilan aloqa qilgan va bu unga virusga qarshi emlanishga turtki bergan.
Avvalroq mamlakat prezidenti Fransisko Sagasti sobiq prezident Martin Viskarra atrofidagi mojaro tufayli sog‘liqni saqlash vaziri Pilar Mazzettining iste’fosini qabul qilganini aytgan edi.
Yanvar boshida Peru hukumati Sinopharm bilan 38 million doza vaksina sotib olish to‘g‘risida shartnoma tuzganini e’lon qildi. 300 ming dozadan iborat birinchi partiya bir hafta oldin olib kelindi va 9-fevral kuni virus yuqish xavfi yuqori bo‘lgan sog‘liqni saqlash xodimlarida COVID-19’ga qarshi emlash dasturi boshlandi.
Pandemiya boshidan buyon Peruda 1,2 millionga yaqin virus bilan zararlanish holati kuzatildi, 43,4 ming kishi virus qurboniga aylandi.
Avvalroq Ispaniya Qurolli kuchlari bosh shtabi boshlig‘i koronavirusga qarshi navbatsiz emlanganlikda ayblangach, iste’foga chiqqani haqida xabar berilgan edi.
Izoh (0)