Перу ташқи ишлар вазири Элизабет Астете 14 февраль куни клиник синовлар ва миллий иммунизация дастури бошланишидан олдин Хитойнинг Sinopharm компаниясига тегишли вакцинанинг биринчи дозасини қабул қилганини тан олди ва истеъфога чиққанини айтди. Бу ҳақда «Интерфакс» хабар берди.
«Мен қандай хатога йўл қўйганимни англадим ва вакцинанинг иккинчи дозасини олмасликка қарор қилдим. Шу сабабдан президентга истеъфога чиқиш ҳақида ариза топширдим», — деб ёзди у Twitter саҳифасида.
Астетенинг баёнотига кўра, декабрь—январь ойларида у коронавирус тести ижобий натижа берган расмийлар билан алоқа қилган ва бу унга вирусга қарши эмланишга туртки берган.
Аввалроқ мамлакат президенти Франциско Сагасти собиқ президент Мартин Вискарра атрофидаги можаро туфайли соғлиқни сақлаш вазири Пилар Маззеттининг истеъфосини қабул қилганини айтган эди.
Январь бошида Перу ҳукумати Sinopharm билан 38 миллион доза вакцина сотиб олиш тўғрисида шартнома тузганини эълон қилди. 300 минг дозадан иборат биринчи партия бир ҳафта олдин олиб келинди ва 9 февраль куни вирус юқиш хавфи юқори бўлган соғлиқни сақлаш ходимларида COVID-19’га қарши эмлаш дастури бошланди.
Пандемия бошидан буён Перуда 1,2 миллионга яқин вирус билан зарарланиш ҳолати кузатилди, 43,4 минг киши вирус қурбонига айланди.
Аввалроқ Испания Қуролли кучлари бош штаби бошлиғи коронавирусга қарши навбатсиз эмланганликда айблангач, истеъфога чиққани ҳақида хабар берилган эди.
Изоҳ (0)