Peruda koronavirusga qarshi Xitoy vaksinasining klinik sinovlari to‘xtatildi

Peruning Kayetano Eredia universitetida Xitoyning Sinopharm kompaniyasi tomonidan ishlab chiqilgan COVID-19’ga qarshi vaksinani klinik sinovlari to‘xtatildi, deya xabar bermoqda “Interfaks”.

Tadqiqot guruhi rahbari Xerman Malaga Radio Programas del Peru radiosiga bergan intervyusida sinovlarni to‘xtatib turish vaqtinchalik va ko‘ngillilarning birida nevrologik asoratlar paydo bo‘lishi bilan bog‘liqligini ma’lum qilgan.

“Bir necha kun oldin biz nazorat qiluvchi idoralarga 64 yoshda bo‘lgan sinov ishtirokchilaridan birida Gilen–Barre sindromi bilan bog‘liq bo‘lishi mumkin bo‘lgan nevrologik alomatlar paydo bo‘lganligi haqida xabar berdik. Ushbu tadqiqotlarning xavfsizligi juda muhimdir, shuning uchun nima bo‘lganini bilish uchun (tadqiqotlarni) to‘xtatib turishga qaror qilindi”, – dedi Xerman Malaga.

Hozirda to‘rtta Xitoy vaksinasi klinik sinovlarning uchinchi bosqichida. Ularning ikkitasi Sinopharm korporatsiyasi tomonidan, uchinchisi CanSinoBIO tomonidan, to‘rtinchisi Sinovac tomonidan ishlab chiqilmoqda.