O‘zbekiston OFK Kubogining 2020-yilgi mavsumi guruh bosqichiga mezbonlik qilishi mumkin.
OKMK va “Nasaf” klublari musobaqaning guruh bosqichiga mezbonlik qilish uchun ariza bergan. Bu haqda PFL bosh direktori vazifasini bajaruvchi Diyor Imomxo‘jayev ma’lum qildi.
O‘zbekiston klublariga bu borada Qirg‘iziston va Tojikiston raqobatchi bo‘ladi.
“Tashkiliy jihat va infratuzilma masalalarida biz albatta qo‘shnilarimizdan ustunroqmiz. Ammo ular bir emas, ikki guruhga mezbonlik qilishga rozi bo‘ldi. Biz esa faqatgina o‘zimizning klublar ishtirok etadigan guruh uchrashuvlarinigina so‘radik”, — deydi Imomxo‘jayev.
Shuningdek, ma’lum bo‘lishicha, O‘zbekiston Osiyo Chempionlar Ligasi guruh bosqichini o‘zida qabul qilish uchun ariza topshirmagan.
Ma’lumot uchun, OChL va OFK Kubogi 2020-yilgi mavsumning guruh bosqich o‘yinlari markazlashgan holda o‘tadi. Avvalroq OFK musobaqalar ishtirokchilaridan mezbonlikka ariza qabul qilishni e’lon qilgandi.
Eslatib o‘tamiz, Osiyo Chempionlar Ligasi pley-off bosqichida qatnashadigan OKMK jamoasi OChL guruh bosqichiga yo‘llanma ola bilsa, u holda “Nasaf” OFK Kubogi ishtirokchisiga aylanadi. Aks holda olmaliqliklar OFK Kubogiga ravona bo‘ladi, qarshiliklar esa Osiyokuboklarsiz qoladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)