Ўзбекистон ОФК Кубогининг 2020 йилги мавсуми гуруҳ босқичига мезбонлик қилиши мумкин.
ОКМК ва «Насаф» клублари мусобақанинг гуруҳ босқичига мезбонлик қилиш учун ариза берган. Бу ҳақда ПФЛ бош директори вазифасини бажарувчи Диёр Имомхўжаев маълум қилди.
Ўзбекистон клубларига бу борада Қирғизистон ва Тожикистон рақобатчи бўлади.
«Ташкилий жиҳат ва инфратузилма масалаларида биз албатта қўшниларимиздан устунроқмиз. Аммо улар бир эмас, икки гуруҳга мезбонлик қилишга рози бўлди. Биз эса фақатгина ўзимизнинг клублар иштирок этадиган гуруҳ учрашувларинигина сўрадик», — дейди Имомхўжаев.
Шунингдек, маълум бўлишича, Ўзбекистон Осиё Чемпионлар Лигаси гуруҳ босқичини ўзида қабул қилиш учун ариза топширмаган.
Маълумот учун, ОЧЛ ва ОФК Кубоги 2020 йилги мавсумнинг гуруҳ босқич ўйинлари марказлашган ҳолда ўтади. Аввалроқ ОФК мусобақалар иштирокчиларидан мезбонликка ариза қабул қилишни эълон қилганди.
Эслатиб ўтамиз, Осиё Чемпионлар Лигаси плей-офф босқичида қатнашадиган ОКМК жамоаси ОЧЛ гуруҳ босқичига йўлланма ола билса, у ҳолда «Насаф» ОФК Кубоги иштирокчисига айланади. Акс ҳолда олмалиқликлар ОФК Кубогига равона бўлади, қаршиликлар эса Осиёкубокларсиз қолади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)