Ronaldodan Ronaldugacha. Plastik jarrohlik amaliyotini boshdan o‘tkazgan yulduz futbolchilar

Bugungi kunda zamonaviy futbol hech bir jabhada shou-biznesdan qolishmaydi. Undagi asosiy shaxslar, ya’ni futbolchilarning tashqi ko‘rinish va kiyinish uslubiga alohida e’tibor qaratishi ham hech kimga sir emas. Odatda shou-biznes vakillarining aksariyati plastik jarrohlik amaliyotiga murojaat qiladi va qanchalik ajablanarli bo‘lmasin, ushbu holatni futbolchilarda ham uchratish mumkin. Ular o‘z sport formasini ushlab turishdan tashqari tashqi go‘zallik bilan ham shug‘ullanishga vaqt topadi. Bu esa o‘z navbatida ularga reklama va roliklarda suratga tushish va qo‘shimcha daromadga ega bo‘lish imkonini beradi. Sezib ulgurganingizdek, quyida tashqi ko‘rinishini o‘zgartirishga qaror qilgan taniqli futbolchilar haqida fikr yuritamiz.

Krishtianu Ronaldu

Portugaliya va “Yuventus” yulduzi Krishtianu Ronaldu hayoti davomida bir necha bor jarrohlik stoliga yotgan. Yoshligida kelishgan odam sifatida ko‘rsatish qiyin bo‘lgan Ronaldu o‘tgan yillar ichida shu darajada o‘zgardiki, hozirda uni nafaqat futbol muxlislari, balki sportdan ancha yiroq bo‘lgan insonlar ham yaxshi taniydi. Ronaldu “Sporting”dan “Manchester Yunayted”ga o‘tganidan so‘ng butun boshli yuz qismini o‘zgartirishga qaror qiladi: burun, iyak, yuz tuzilishi va tishlar. Shuningdek, portugaliyalikning soch ko‘chirish muolajasini ham o‘tkazgani aytiladi. Shu tariqa Ronaldu futboldan umuman xabari bo‘lmagan millionlab muxlislarga ega bo‘lgan. Buni uning ijtimoiy tarmoqlarda eng mashhur inson ekanligi ham isbotlashi mumkin.

Zlatan Ibragimovich

Italiyaning shonli “Milan” klubida ikkinchi yoshligini o‘tkazayotgan shvetsiyalikning bolaligi havas qilarli darajada o‘tmagan. Muhojirlar oilasida yo‘qchilikda katta bo‘lgan Zlatanni katta burni tufayli tengdosh va jamoadoshlari “Buratino” deb masxara qilgan. Ammo 2013-yilga kelib, Ibragimovichning burni ixcham va chiroyliroq ko‘rinish oldi. Garchi futbolchining o‘zi bu haqida gapirishni istamasa-da, inkor ham qilmaydi.

Garet Beyl

Ayni paytda “Real”ning tom ma’nodagi bosh og‘rig‘i bo‘lib turgan Garet Beyl “Tottenhem”da o‘ynab yurgan kezlari ulkan quloqlarga ega edi. Hech narsani e’tiborsiz qoldirmaydigan ingliz matbuoti esa bu borada ham uelslikka tinchlik bermasdi. Ammo Beyl 2013-yilda “Real”ga o‘tganidan so‘ng klubi bilan bir qatorda quloqlari shaklini ham o‘zgartirishga qaror qiladi. Bu o‘zgarish yakunda unga yaxshi tomondan ta’sir qiladi va reklamalarga taklif etila boshladi.

Rene Igita

Rene Igita eng “plastik” futbolchi unvoni uchun bemalol Krishtianu Ronaldu bilan raqobatlasha oladi. Boisi u ham bir vaqtning o‘zida rinoplastika (burun to‘g‘rilash), liposaksiya, ajinlarni yo‘qotish, yuzni torttirish va iyak sohalarida jarrohlik amaliyotini boshdan o‘tkazgan.

Shu tariqa kolumbiyalik darvozabon “eng qo‘rqinchli odam” nomidan xalos bo‘ladi. “Chayon zarbasi” bilan mashhurlikka erishgan futbolchi hech qachon plastik jarrohlik amaliyotini o‘tkazganini yashirmagan.

Ronaldo

Braziliyalik sobiq hujumchi faoliyatining dastlabki yillaridan boshlab, ortiqcha vazn muammosidan aziyat chekkan va hatto bu uning fobiyasi ham bo‘lgan. Ammo 30 yoshdan oshganida “So‘yloq”ni bu muammo yana ham ko‘proq tashvishga sola boshlaydi. Ronaldo esa ko‘p o‘ylab o‘tirmasdan yog‘larni yo‘qotish maqsadida jarrohlik stoliga yotishga qaror qiladi. Ammo bu uni ushbu muammodan to‘laligicha xalos qilolmaydi.