Gvineya hukumati mamlakat janubida Ebola bezgagi epidemiyasi boshlanganini e’lon qildi. Bu haqda Guinee114 yangiliklar portali hukumat bayonotiga tayanib xabar berdi.
“Gvineya hukumati Guyeke hududidagi Nzerekore prefekturasida Ebola virusi keltirib chiqaradigan kasallik epidemiyasi haqida e’lon qiladi”, — deyiladi bayonotda.
Hukumat ma’lumotlariga qaraganda, Ebola bilan bog‘liq birinchi holat Guyeke shahridagi hamshirada qayd etilgan, u 28-yanvar kuni vafot etgan. Keyinroq uning dafn marosimida qatnashgan yetti kishida ham kasallik aniqlangan, ularning uch nafari vafot etgan.
Shoshilinch majlisda kasallikning tarqalishiga qarshi kurash bo‘yicha bir qator choralarni joriy qilishga, shu jumladan, Ebola bilan kasallangan bemor bilan muloqotda bo‘lganlarning barchasini aniqlash va izolyatsiya qilishga qaror qilindi.
Avvalroq Jahon sog‘liqni saqlash tashkiloti (JSST) bosh direktori Tedros Gebreyesus ayni paytda tekshiruv testlari o‘tkazilayotganini ma’lum qilgandi.
Eslatib o‘tamiz, Janubiy Afrikada joylashgan Gvineyada 2016-yildan beri birinchi marta Eboladan kamida to‘rtta o‘lim holati qayd etilgani xabar berilgan edi.
Ma’lumot uchun, Ebola virusi odam va hayvonlarga ta’sir qiluvchi o‘tkir infeksiyani keltirib chiqaradi. Kasallik birinchi marta 1976-yilda aniqlangan. Ushbu virusli kasallik 2013—2016-yillarda G‘arbiy Afrikada juda keng tarqalib ketdi. Gvineyada boshlangan kasallik Liberiya va Syerra-Leonega ham o‘tib ketdi. Kasallikning o‘ziga xos xavfli jihati unda kasallanganlar orasida o‘lim holatining yuqoriligidadir. O‘sha paytda 11 315 kishi yoki kasallarning 50 foizi vafot etgan. 2019-yilning iyul oyida Kongoda qayd etilganidan keyin JSST xalqaro favqulodda holat e’lon qilgan. Mamlakatda kasallik paydo bo‘lganidan buyon 2200 kishi vafot etgan.
Izoh (0)