Bugungi futbol yetarli darajada yumshoq bo‘lib, to‘p uchun kurashda tom ma’noda jonini beradigan o‘yinchilar juda kamdan kam uchraydi. Biroq bundan 15-20 yil oldin haqiqiy jangchilar juda ko‘p edi va ular doimo o‘z harakatlari bilan diqqat markazida bo‘lib kelgan. Quyida yakka kurashlarda o‘zini ham, raqibini ham ayamagan futbolchilar haqida fikr yuritiladi.
Edgar Davids
Ushbu tayanch yarim himoyachisi o‘z pozitsiyasining haqiqiy egalaridan biri edi. Deyarli hech qaysi futbolchi niderlandiyalikning oldida o‘z texnikasini namoyish etishni xohlamasdi. Edgar o‘z qo‘polligining “cho‘qqisi”ga “Yuventus”dagi faoliyatida chiqqan, o‘shanda u Chempionlar Ligasining bir mavsumida naq 4 ta qizil kartochka olgandi. Ahvol shu darajaga yetib borardiki, Davids hatto o‘rtoqlik uchrashuvlarida ham qizil kartochkalar olar va raqiblar bilan yoqalashib ketardi.
Roy Kin
Qizil kartochkalar soni (14) bo‘yicha APL rekordchisi Roy Kin faqatgina oyoqlari yordamida to‘pni raqiblaridan tortib olardi. Bunda u yuqorida ta’kidlanganidek, na o‘zini va na boshqalarni ayab o‘tirardi. Roy hatto bir safar Alf-Inge Holandga (“Borussiya D” hujumchisi Erling Holandning otasi) qasddan jarohat yetkazgandi. Natijada katta Holand ushbu jarohat tufayli faoliyatini erta yakunlashga majbur bo‘lgandi.
Kimdir uning asabiga teggan taqdirda Roy, albatta, buni javobsiz qoldirmagan. Shunga qaramay Kin vaqtida o‘z jamoalarining (“Manchester Yunayted” va Irlandiya termasi) tom ma’nodagi yetakchisi va afsonasi bo‘lgan.
Jennaro Gattuzo
Ehtimol, Gattuzo futbol tarixidagi eng hissiyotlarga beriluvchan futbolchi bo‘lsa kerak. Yakka kurashlarda va raqib hujumlarini to‘xtatishda unga teng keladigani yo‘q edi. Shu bilan birga u bunda raqiblar tugul jamoadoshlarini ham ayab o‘tirmasdi. Davids bilan bo‘lgani kabi raqiblar italiyalikni aldab o‘tishga uringandan ko‘ra tinchgina to‘pni sherigiga oshirishni afzal ko‘rardi. Shu tariqa ayni damdagi “Napoli” bosh murabbiyiga o‘z vaqtida “qo‘riqchi” laqabi berilgandi. U esa bu nomni to‘laligicha oqlagan.
Nayjel de Yong
Agar Gattuzo o‘z hissiyotlarini jilovlashga harakat ham qilib ko‘rmagan bo‘lsa, Nayjel de Yong o‘z qo‘polligidan umuman uyalmasdi. Bu qo‘polliklar 2010-yilda o‘z “cho‘qqisi”ga chiqadi. JARda bo‘lib o‘tgan 2010-yilgi Jahon Chempionati finalida de Yong Ispaniya terma jamoasi yarim himoyachisi Xabi Alonsoga kung fu uslubida zarba beradi, yetmaganiga esa hech narsa qilmagandek ikki qo‘lini baland ko‘tarib, ajablanib ham qo‘yadi. Ajoyib holat-a? Shuningdek, u aynan shu yilning o‘zida yana ikki nafar futbolchining oyog‘ini sindirishga “muvaffaq” bo‘ladi.
Pepe
Portugaliyalik himoyachi faoliyati davomida “Portu”, “Real” va “Beshiktosh” kabi jamoalarda o‘ynagan. Hozirda esa yana qadrdon jamoasi “Portu” sharafini himoya qilmoqda. Shuningdek, u doimiy ravishda vatani (Portugaliya) terma jamoasi o‘yinlariga jalb etib kelinadi.
Pepe, ayniqsa, Ispaniyada o‘ynagan kezlari o‘zining dahshatli va xunuk xatti-harakatlari bilan barchani hayratga solib kelardi. La Liga doirasida o‘tkazilgan “Xetafe”ga qarshi bahsda Pepe raqib jamoa sardori Fransisko Kaskeroni maydonga yiqitadi, shundan so‘ng uni bir necha bor tepadi ham va oxirida uning qo‘lini bosib o‘tib ketadi. Biroq bunday holatlar Pepening faoliyatida ko‘p marotaba sodir bo‘lgan va futbolchi bunga ko‘nikib ham qolgan bo‘lsa kerak. Bundan tashqari portugaliyalik futbolchi deyarli har bir o‘yinda qoidalarni qo‘pol ravishda buzishdan va raqiblarga kutilmaganda zarba berib qolishdan ham zarracha “tortinmaydi”.
Izoh (0)