Samarqand viloyatining Kattaqo‘rg‘on shahrida ko‘cha-ko‘yda IIB xodimlari kiyimini kiyib yurgan fuqaro javobgarlikka tortiladigan bo‘ldi. Bu haqda “Daryo”ga viloyat IIB axborot xizmati ma’lum qildi.
IIV O‘z Xavfsizligi boshqarmasi Samarqand viloyati bo‘yicha bo‘limi xodimlari tomonidan olingan ma’lumotga asosan, Kattaqo‘rg‘on shahri hududida joylashgan 7-son tergov hibsxonasi atrofida ichki ishlar organlari xodimlarining dala kiyimini kiyib yurgan shaxs borligi va uning harakati shubha uyg‘otayotgani ma’lum bo‘lgan.
IIB xodimlari maxsus kiyimda yurgan shaxsdan xizmat guvohnomasini taqdim etishni so‘raganda u xizmat guvohnomasi yo‘qligini bildirgan.
Holatga oydinlik kiritish maqsadida fuqaro Kattaqo‘rg‘on shahar IIBga olib borilib, shaxsiga aniqlik kiritilgan.
Ma’lum bo‘lishicha, ushbu shaxs Narpay tumani, “Chaqar” MFY, “Chaqar” qishlog‘ida yashovchi, 1997-yilda tug‘ilgan Sh.M. bo‘lgan. U egnidagi ichki ishlar organlarining dala harbiy kiyimini ikki oy oldin 240 ming so‘m evaziga tiktirib olganini bildirgan.
Holat bo‘yicha Kattaqo‘rg‘on shahar IIB HPB tomonidan tergovga qadar tekshiruv harakatlari olib borilib, Sh.M.ning ustida bo‘lgan harbiy dala kiyimi xolislar ishtirokida hujjatlashtirib olingan. Uning harakatlarida Ma’muriy javobgarlik to‘g‘risidagi kodeksning 209-1-moddasida (vazirliklar, idoralar va tashkilotlar xodimlarining formali kiyim-boshini qonunga xilof ravishda kiyib yurish) ko‘rsatilgan ma’muriy huquqbuzarlik alomati aniqlangani sababli unga nisbatan ma’muriy bayonnoma rasmiylashtirilib, to‘plangan hujjatlar ko‘rib chiqish uchun Jinoyat ishlari bo‘yicha Kattaqo‘rg‘on shahar sudiga yuborilgan.
Hozirda ushbu shaxsning harakatlari yuzasidan qo‘shimcha tekshiruv ishlari olib borilmoqda.
Izoh (0)