Navoiyda tezlikni oshirgan Cobalt haydovchisi boshqaruvni yo‘qotib, yuk mashinaga urildi va yonib ketdi. Bu haqda “Daryo”ga Navoiy viloyati IIB YHXB matbuot guruhi rahbari Farruh Yakubov ma’lum qildi.
Ta’kidlanishicha, 2021-yil 8-fevral kuni Qiziltepa tumani hududidan o‘tuvchi M-37 Samarqand—Buxoro—Turkmanboshi avtomobil yo‘lining 192-kilometrida Navoiy—Buxoro yo‘nalishida harakatlanib kelgan fuqaro D.B. Cobalt avtomobilida yo‘l harakati qoidalariga rioya qilmay, taqiqlangan manzilda harakat tezligini oshirgan. O‘zi bilan bir yo‘nalishda harakatlanib kelayotgan Mercedes-Benz rusumli yuk avtomobilining chap yon tomoniga urilgan.
Oqibatda Cobalt’da qisqa tutashuv sodir bo‘lib, yong‘in kelib chiqqan. Yong‘in natijasida Cobalt yo‘lovchisi 1994-yilda tug‘ilgan, Qiziltepa tumanida yashovchi fuqaro M.G‘. og‘ir tan jarohati olgan va tuman markaziy shifoxonasiga yotqizilgan.
“Yong‘in favqulodda vaziyatlar boshqarmasi yong‘in o‘chirish xodimlari tomonidan bartaraf etildi. Bir kun oldin, ya’ni 2021-yilning 7-fevralida Cobalt va Tico to‘qnashuvi oqibatida haydovchi yonib ketgan edi. Haydovchilarni yo‘l harakati qoidalariga rioya qilishga, shuningdek, yonlama masofani saqlash qoidasiga qat’iy amal qilishga chaqiramiz, — dedi Yakubov.
Ayn paytda Cobalt haydovchisi fuqaro D.B.ning xatti-harakatiga nisbatan tergovga qadar surishtiruv ishlari olib borilmoqda.
Avvalroq Namanganda 20 yoshli yigit boshqaruvidagi Lacetti katta tezlikda reklama ustuniga borib urilib, haydovchi va ikki nafar yo‘lovchi voqea joyida vafot etgani haqida xabar berilgandi.
Izoh (0)