Навоийда тезликни оширган Cobalt ҳайдовчиси бошқарувни йўқотиб, юк машинага урилди ва ёниб кетди. Бу ҳақда «Дарё»га Навоий вилояти ИИБ ЙҲХБ матбуот гуруҳи раҳбари Фарруҳ Якубов маълум қилди.
Таъкидланишича, 2021 йил 8 февраль куни Қизилтепа тумани ҳудудидан ўтувчи М-37 Самарқанд—Бухоро—Туркманбоши автомобиль йўлининг 192-километрида Навоий—Бухоро йўналишида ҳаракатланиб келган фуқаро Д.Б. Cobalt автомобилида йўл ҳаракати қоидаларига риоя қилмай, тақиқланган манзилда ҳаракат тезлигини оширган. Ўзи билан бир йўналишда ҳаракатланиб келаётган Mercedes-Benz русумли юк автомобилининг чап ён томонига урилган.
Оқибатда Cobalt’да қисқа туташув содир бўлиб, ёнғин келиб чиққан. Ёнғин натижасида Cobalt йўловчиси 1994 йилда туғилган, Қизилтепа туманида яшовчи фуқаро М.Ғ. оғир тан жароҳати олган ва туман марказий шифохонасига ётқизилган.
«Ёнғин фавқулодда вазиятлар бошқармаси ёнғин ўчириш ходимлари томонидан бартараф этилди. Бир кун олдин, яъни 2021 йилнинг 7 февралида Cobalt ва Тicо тўқнашуви оқибатида ҳайдовчи ёниб кетган эди. Ҳайдовчиларни йўл ҳаракати қоидаларига риоя қилишга, шунингдек, ёнлама масофани сақлаш қоидасига қатъий амал қилишга чақирамиз, — деди Якубов.
Айн пайтда Cobalt ҳайдовчиси фуқаро Д.Б.нинг хатти-ҳаракатига нисбатан терговга қадар суриштирув ишлари олиб борилмоқда.
Аввалроқ Наманганда 20 ёшли йигит бошқарувидаги Lacetti катта тезликда реклама устунига бориб урилиб, ҳайдовчи ва икки нафар йўловчи воқеа жойида вафот этгани ҳақида хабар берилганди.
Изоҳ (0)