Moskva hayvonot bog‘ida Papua pingvinlariga pufakli bazm uyushtirildi. Avvaliga pingvinlar sovun pufaklarini shunchaki kuzatish bilan cheklangan, biroq ko‘p o‘tmay ular “pufaklar ortidan quvib, tumshuqlari yordamida yora boshlagan”. Bu haqda hayvonot bog‘ining Instagram’dagi sahifasi orqali ma’lum qilindi.
“Xodimlar qushlarni yangi buyumlarga qiziqtirishni, shuningdek, guruh ichida qo‘shimcha aloqa uchun sharoit yaratishni xohladi”, — deyiladi post izohida.
Moskva hayvonot bog‘idagilarning ta’kidlashicha, sovun pufaklaridan dunyoning ko‘plab hayvonot bog‘larida foydalaniladi, chunki u hayvonlar uchun hech qanday xavf tug‘dirmaydi va ular uchun “ajoyib ko‘ngilxushlik” hisoblanadi.
Hayvonot bog‘ining saytidagi ma’lumotlarga ko‘ra, Papua pingvinlari Moskvaga 2017-yilning kuzida Germaniyaning Frankfurt-na-Mayn shahridan olib kelingan.
Avvalroq Britaniyada hayvonot bog‘idagi pingvinlar karantinda zerikib qolgani, shu sabab ularga kayfiyatini ko‘tarish uchun pufak chiqaruvchi mashina sovg‘a qilingani to‘g‘risida xabar berilgandi.
Izoh (0)