Москва ҳайвонот боғида Папуа пингвинларига пуфакли базм уюштирилди. Аввалига пингвинлар совун пуфакларини шунчаки кузатиш билан чекланган, бироқ кўп ўтмай улар «пуфаклар ортидан қувиб, тумшуқлари ёрдамида ёра бошлаган». Бу ҳақда ҳайвонот боғининг Instagram’даги саҳифаси орқали маълум қилинди.
«Ходимлар қушларни янги буюмларга қизиқтиришни, шунингдек, гуруҳ ичида қўшимча алоқа учун шароит яратишни хоҳлади», — дейилади пост изоҳида.
Москва ҳайвонот боғидагиларнинг таъкидлашича, совун пуфакларидан дунёнинг кўплаб ҳайвонот боғларида фойдаланилади, чунки у ҳайвонлар учун ҳеч қандай хавф туғдирмайди ва улар учун «ажойиб кўнгилхушлик» ҳисобланади.
Ҳайвонот боғининг сайтидаги маълумотларга кўра, Папуа пингвинлари Москвага 2017 йилнинг кузида Германиянинг Франкфурт-на Майн шаҳридан олиб келинган.
Аввалроқ Британияда ҳайвонот боғидаги пингвинлар карантинда зерикиб қолгани, шу сабаб уларга кайфиятини кўтариш учун пуфак чиқарувчи машина совға қилингани тўғрисида хабар берилганди.
Изоҳ (0)