Қашқадарё вилоятининг Деҳқонобод туманида 60 туп Зарафшон арчаси, 84 туп арча ва 1 туп учқот дарахти кесилишига йўл қўйиб берган ўрмон беги ва қўриқчиси салкам 194 миллион сўм жарима тўлаши мумкин. Бу ҳақда Деҳқонобод туман ҳокимлиги ахборот хизмати маълум қилди.
Ҳокимлик ахборот хизмати билан суҳбатлашган туман Экология ва атроф-муҳитни муҳофаза қилиш соҳасидаги назорат инспекцияси бошлиғи Ўктам Жўллиев бу ҳақда туман прокуратурасига ҳужжатлар тақдим этилиб, айбдорларга чора кўрилишида кўмак сўралганини маълум қилган.
«Ходимларимиз томонидан ҳолат ўрганилганда Деҳқонобод давлат ўрмон хўжалиги Оқбош ўрмон бўлимининг Жангалсой ва Қоронғиқўл массивларидаги табиий ҳолда ўсган 60 туп Зарафшон арчаси таг қисмидан кесилиб, ўсишдан тўхташ даражасига етказилгани, шунингдек, 84 туп арча ва 1 туп учқот эса ўсишда давом этиши мумкин бўлган даражада кесилгани маълум бўлди», — дейди туман Экология ва атроф-муҳитни муҳофаза қилиш соҳасидаги назорат инспекцияси бошлиғи Ўктам Жўллиев.
Таъкидланишича, ҳолат экология ходимлари томонидан аниқлангач етказилган зарар 193 миллион 341 минг сўмни ташкил қилиши ойдинлашган.
«Бу ҳақда туман прокуратурасига ҳужжатлар тақдим этилиб, кесилган дарахтлар сурати ҳам берилган ва мазкур ҳолатга йўл қўйиб берган Оқбош ўрмон бўлими ўрмон беги Э.Ғ. ва ўрмон қўриқчиси Б.Б.дан етказилган зарарни ундиришда кўмак сўралди», — дейди Ўктам Жўллиев.
Изоҳ (0)