Россиянинг Mobile Inform Group компанияси Android 10 операцион тизимида ишлайдиган MIG S6 саноат смартфонининг янги версияси сотувга чиққанини эълон қилди, деб хабар беради IXBT.
Афтидан, бу 2020 йили тақдим этилган MIG S6 смартфонининг бир оз янгиланган ва янги операцион тизим ўрнатилган версияси ҳисобланади. Киритилган ўзгартиришлар қаторидан — тушунарли интерфейс ўрин олган, шунингдек, тунги режим ва батарея созламаларининг яхшиланиши ҳисобига автономлиги оширилган.
Смартфоннинг чакана савдодаги тавсия этилган нархи 83 914 рубль (1135 доллар). Таққослаш учун: Samsung Galaxy S21 нархи 74 990 рублдан (1015 доллар), iPhone 12 эса 79 990 рублдан (1080 доллар) бошланади.
2020 йилги MIG S6 модели анча арзон нархда сотувга чиққанди (69 минг рубль), бироқ унинг ҳимоя даражаси бир оз пастроқ эди. Масалан, намлик ва чангдан ҳимоя қилиш стандарти IP67’дан IP68’га ошган, шунингдек, смартфон учқун чиқишига қарши сертификатга эга бўлган ва ундан портловчи муҳитда ҳам фойдаланиш мумкин.
Ишлаб чиқарувчининг ваъда қилишича, MIG’нинг барча қурилмалари Android 10 операцион тизимидаги АRМ архитектурасида 2021 йилнинг иккинчи чорагига қадар сотувга чиқади.
MIG S6’га пикселлари сони 1440 х 720 бўлган 6 дюймли экран ўрнатилган, камералари 5 ва 13 мегапиксель, аккумулятор сиғими 5000 мА/соат. Қурилма асосини SоC Qualcomm Snapdragon 450 (3 Гб тезкор ва 32 Гб ички хотира) ташкил этади. Бундан ташқари, смартфон 4G LTE алоқа тармоғини қўллаб-қувватлайди, иккита SIM-карта билан ишлай олади, Bluetooth 4.2, NFC, GPS+ГЛОНАСС, USB Type-C мавжуд. Ўлчами 162х82х14 миллиметр, оғирлиги — 230 грамм.
Изоҳ (0)