“Rosstat” (Davlat statistikasi federal xizmati) 8-fevral kuni 2020-yil uchun Rossiyadagi o‘lim holatlari haqidagi ma’lumotlarni e’lon qildi. Ularga ko‘ra, mamlakatda apreldan 31-dekabrgacha ortiqcha o‘lim holatlari 358 ming kishini tashkil qilgan, deb yozadi Meduza.
Ortiqcha o‘limlar soni — birorta hududda ma’lum bir davr ichida o‘lim darajasining o‘rtacha bir necha yillik (ushbu holatda so‘nggi besh yil) ko‘rsatkichdan og‘ishi. Odatda epidemiya yoki tabiiy ofatlar sababli.
“Avvalroq Rossiya bosh vaziri o‘rinbosari Tatyana Golikova 2020-yilda ortiqcha o‘limlar soni 81 foizga koronavirus bilan bog‘liq ekanligini aytib o‘tgan, qolgan 19 foizi nimaga aloqador ekanligini izohlamagan edi. Moskva sog‘liqni saqlash departamentining batafsilroq ma’lumotlarida esa ortiqcha o‘limlarning 98-100 foizi virus bilan bog‘liqligi aytiladi. Agar ortiqcha o‘limlarning deyarli barchasi haqiqatda epidemiya oqibatida kelib chiqqan, deb hisoblansa, 2020-yilda koronavirus tufayli o‘limlar hukumat tomonidan rasman ma’lum qilingan 57 mingtadan 6,3 martaga ko‘proq bo‘lgan. Bu shuni bildiradiki, Rossiya 2020-yilda koronavirus qurbonlari soni bo‘yicha dunyoda ikkinchi (AQShdan keyingi) o‘rinni egallab, aholi boshiga hisoblaganda eng ko‘p jabr ko‘rgan mamlakatlar beshligiga kirgan. Fevral boshiga kelib esa Rossiya har 100 ming aholi boshiga o‘limlar soni bo‘yicha birinchi o‘ringa chiqib olgan bo‘lishi kerak”, — deyiladi xabarda.
Rossiyada aholining deyarli yarmi kasallanib o‘tgan. Uchinchi to‘lqin xavfi esa saqlanib qolmoqda.
“Ortiqcha o‘limlar soni haqidagi ma’lumotlarga tayanib, kasallanib o‘tganlarning taxminiy sonini aniqlash mumkin. Virusning o‘limga olib kelish darajasi (letallik) odatda 0,66 foiz deb baholanmoqda. Shunga ko‘ra, kasallanib o‘tganlar ulushi yanvar boshida aholining 45-47 foiziga yetgan. Butun yanvar davomida ulush 50 foizdan oshgan bo‘lishi kerak. Bu esa jamoaviy immunitet marrasiga yaqin ko‘rsatkich… Ammo jamoaviy immunitet marrasi bahorda ko‘tarilishi mumkin — bunga Rossiyaga virusning yuqumliroq, masalan “britancha” shtammi kelib qolishi sabab bo‘lishi mumkin. Bu epidemiyaning haqiqiy uchinchi to‘lqiniga, sog‘liqni saqlash tizimining yangi inqiroziga va yana 100 mingdan ortiq odamning o‘limiga olib kelishi mumkin”, — deyiladi xabarda.
Eslatib o‘tamiz, Rossiyada koronavirusga chalinganlar soni 4 million kishidan oshdi. O‘tgan bir kecha-kunduz davomida COVID-19 yuqtirish bo‘yicha 14 494 ta yangi holat aniqlanib, virusga chalinganlar soni jami 4 012 710 nafarga yetdi.
Izoh (0)