«Росстат» (Давлат статистикаси федерал хизмати) 8 февраль куни 2020 йил учун Россиядаги ўлим ҳолатлари ҳақидаги маълумотларни эълон қилди. Уларга кўра, мамлакатда апрелдан 31 декабргача ортиқча ўлим ҳолатлари 358 минг кишини ташкил қилган, деб ёзади Meduza.
Ортиқча ўлимлар сони — бирорта ҳудудда маълум бир давр ичида ўлим даражасининг ўртача бир неча йиллик (ушбу ҳолатда сўнгги беш йил) кўрсаткичдан оғиши. Одатда эпидемия ёки табиий офатлар сабабли.
«Аввалроқ Россия бош вазири ўринбосари Татьяна Голикова 2020 йилда ортиқча ўлимлар сони 81 фоизга коронавирус билан боғлиқ эканлигини айтиб ўтган, қолган 19 фоизи нимага алоқадор эканлигини изоҳламаган эди. Москва соғлиқни сақлаш департаментининг батафсилроқ маълумотларида эса ортиқча ўлимларнинг 98-100 фоизи вирус билан боғлиқлиги айтилади. Агар ортиқча ўлимларнинг деярли барчаси ҳақиқатда эпидемия оқибатида келиб чиққан, деб ҳисобланса, 2020 йилда коронавирус туфайли ўлимлар ҳукумат томонидан расман маълум қилинган 57 мингтадан 6,3 мартага кўпроқ бўлган. Бу шуни билдирадики, Россия 2020 йилда коронавирус қурбонлари сони бўйича дунёда иккинчи (АҚШдан кейинги) ўринни эгаллаб, аҳоли бошига ҳисоблаганда энг кўп жабр кўрган мамлакатлар бешлигига кирган. Февраль бошига келиб эса Россия ҳар 100 минг аҳоли бошига ўлимлар сони бўйича биринчи ўринга чиқиб олган бўлиши керак», — дейилади хабарда.
Россияда аҳолининг деярли ярми касалланиб ўтган. Учинчи тўлқин хавфи эса сақланиб қолмоқда.
«Ортиқча ўлимлар сони ҳақидаги маълумотларга таяниб, касалланиб ўтганларнинг тахминий сонини аниқлаш мумкин. Вируснинг ўлимга олиб келиш даражаси (леталлик) одатда 0,66 фоиз деб баҳоланмоқда. Шунга кўра, касалланиб ўтганлар улуши январь бошида аҳолининг 45-47 фоизига етган. Бутун январь давомида улуш 50 фоиздан ошган бўлиши керак. Бу эса жамоавий иммунитет маррасига яқин кўрсаткич… Аммо жамоавий иммунитет марраси баҳорда кўтарилиши мумкин — бунга Россияга вируснинг юқумлироқ, масалан «британча» штамми келиб қолиши сабаб бўлиши мумкин. Бу эпидемиянинг ҳақиқий учинчи тўлқинига, соғлиқни сақлаш тизимининг янги инқирозига ва яна 100 мингдан ортиқ одамнинг ўлимига олиб келиши мумкин», — дейилади хабарда.
Эслатиб ўтамиз, Россияда коронавирусга чалинганлар сони 4 миллион кишидан ошди. Ўтган бир кеча-кундуз давомида COVID-19 юқтириш бўйича 14 494 та янги ҳолат аниқланиб, вирусга чалинганлар сони жами 4 012 710 нафарга етди.
Изоҳ (0)