O‘zbekiston Energetika vaziri Alisher Sultonov “Amerika ovozi” (VoA)ga bergan intervyusida mamlakatdagi energiya manbalaridan oqilona va samarali foydalanish to‘g‘risida gapirdi, deb xabar bermoqda “Gazeta.uz”.
Uning aytishicha, ayrim hududlarga gaz quvuri yotqizilsa ham, bosim yo‘qligi tufayli gaz yetkazib berolmaydi. “Chunki bosim yo‘q, miqdor bo‘lgani bilan. Bu — tizimli muammo. Iqtisodiyot nuqtai nazaridan ham, mentalitet, dunyoqarash nuqtai nazaridan ham”, — degan u.
Alisher Sultonovning so‘zlariga ko‘ra, yaqinda yirik turk kompaniyasi rahbari bosh vazir Abdulla Aripov bilan uchrashuvda O‘zbekistonda gaz bilan bog‘liq katta muammolar borligini ma’lum qilgan.
“U shunday deyapti: Turkiya davlatida ishlab chiqarish, sanoat rivojlangan, bularning barchasi energiya resurslarini talab qiladi. Bizning aholimiz 95 million. Ularning ham yashashi yaxshi, hech kim qishda sovuqda o‘tirmaydi. Biz 95 million aholi va rivojlangan sanoat bilan yillik 45 milliard kub metr gaz iste’mol qilsak, O‘zbekiston 35 million aholi bilan 45 milliard kub metr gaz iste’mol qilmoqda”, — deya turkiyalik tadbirkorning so‘zlarini keltirdi energetika vaziri.
“Shuning uchun ‘energosamaradorlik’ bizning yillar davomidagi asosiy shiorimiz bo‘lishi kerak. Eng asosiy islohotimiz bu — energiya tejamkorligi. Bu narsani kichkina bolachaning miyasiga tishingni tozalayotganda suvni o‘chirib qo‘y, xonadan chiqayotganda chiroqni o‘chir kabilardek singdirib qo‘ysak… Oddiy misollar. Chunki buning ichida juda ham ko‘p narsa bor. Buning ichida ishlab chiqarishning ham energotejamkorligi bor. Hozirgi kunda 90 foiz, mayli 70 foiz ishlab chiqarishda energotejamkorlikka javob bermaydigan uskunalar o‘rnatilgan, eski-eski. O‘shani hozir modernizatsiya qiladigan bo‘lsak, yangisini quradigan bo‘lsak, 2, 3, 4 barobargacha energiyani kam ishlatadi. Bu jarayon boshlandi”, — degan u.
Vazir O‘zbekiston yaqin vaqtlarga qadar qayta tiklanuvchi energiya manbalaridan foydalanmagani xato ekanligini ta’kidlab o‘tdi.
Alisher Sultonov Alter Ego loyihasiga bergan intervyusida mamlakatdagi energetika tizimining hozirgi ahvoli — bu Sovet Ittifoqining merosi va O‘zbekistonning o‘zining 30 yil harakatsizligi oqibati ekanligini aytgandi. Shuningdek, so‘nggi 30-35 yilda gaz qazib olish hajmini yildan yilga kamaytirib borish evaziga “O‘zbekneftgaz”ni bankrot qilishga urinishganini ma’lum qilgan edi.
Avvalroq 2020-yilda O‘zbekiston 50,4 million dollarga gaz import qilgani, bu 2019-yilga qaraganda 237 martaga ko‘p ekani haqida xabar berilgan edi. Eksport hajmi esa qiymat jihatdan 4,7 barobarga kamaydi.
Izoh (0)