Ўзбекистон Энергетика вазири Алишер Султонов «Америка овози» (VoA)га берган интервьюсида мамлакатдаги энергия манбаларидан оқилона ва самарали фойдаланиш тўғрисида гапирди, деб хабар бермоқда «Gazeta.uz».
Унинг айтишича, айрим ҳудудларга газ қувури ётқизилса ҳам, босим йўқлиги туфайли газ етказиб беролмайди. «Чунки босим йўқ, миқдор бўлгани билан. Бу — тизимли муаммо. Иқтисодиёт нуқтаи назаридан ҳам, менталитет, дунёқараш нуқтаи назаридан ҳам», — деган у.
Алишер Султоновнинг сўзларига кўра, яқинда йирик турк компанияси раҳбари бош вазир Абдулла Арипов билан учрашувда Ўзбекистонда газ билан боғлиқ катта муаммолар борлигини маълум қилган.
«У шундай деяпти: Туркия давлатида ишлаб чиқариш, саноат ривожланган, буларнинг барчаси энергия ресурсларини талаб қилади. Бизнинг аҳолимиз 95 миллион. Уларнинг ҳам яшаши яхши, ҳеч ким қишда совуқда ўтирмайди. Биз 95 миллион аҳоли ва ривожланган саноат билан йиллик 45 миллиард куб метр газ истеъмол қилсак, Ўзбекистон 35 миллион аҳоли билан 45 миллиард куб метр газ истеъмол қилмоқда», — дея туркиялик тадбиркорнинг сўзларини келтирди энергетика вазири.
«Шунинг учун ‘энергосамарадорлик’ бизнинг йиллар давомидаги асосий шиоримиз бўлиши керак. Энг асосий ислоҳотимиз бу — энергия тежамкорлиги. Бу нарсани кичкина болачанинг миясига тишингни тозалаётганда сувни ўчириб қўй, хонадан чиқаётганда чироқни ўчир кабилардек сингдириб қўйсак… Оддий мисоллар. Чунки бунинг ичида жуда ҳам кўп нарса бор. Бунинг ичида ишлаб чиқаришнинг ҳам энерготежамкорлиги бор. Ҳозирги кунда 90 фоиз, майли 70 фоиз ишлаб чиқаришда энерготежамкорликка жавоб бермайдиган ускуналар ўрнатилган, эски-эски. Ўшани ҳозир модернизация қиладиган бўлсак, янгисини қурадиган бўлсак, 2, 3, 4 баробаргача энергияни кам ишлатади. Бу жараён бошланди», — деган у.
Вазир Ўзбекистон яқин вақтларга қадар қайта тикланувчи энергия манбаларидан фойдаланмагани хато эканлигини таъкидлаб ўтди.
Алишер Султонов Alter Ego лойиҳасига берган интервьюсида мамлакатдаги энергетика тизимининг ҳозирги аҳволи — бу Совет Иттифоқининг мероси ва Ўзбекистоннинг ўзининг 30 йил ҳаракатсизлиги оқибати эканлигини айтганди. Шунингдек, сўнгги 30-35 йилда газ қазиб олиш ҳажмини йилдан йилга камайтириб бориш эвазига «Ўзбекнефтгаз»ни банкрот қилишга уринишганини маълум қилган эди.
Аввалроқ 2020 йилда Ўзбекистон 50,4 миллион долларга газ импорт қилгани, бу 2019 йилга қараганда 237 мартага кўп экани ҳақида хабар берилган эди. Экспорт ҳажми эса қиймат жиҳатдан 4,7 баробарга камайди.
Изоҳ (0)