Farg‘ona viloyati hokimi Xayrulla Bozorovning birinchi o‘rinbosari Mirzohid Ubaydullayev Farg‘ona shahriga yangi hokim etib tayinlandi, deya xabar berdi “Daryo” muxbiri.
Ta’kidlanishicha, bugun, 9-fevral kuni xalq deputatlari Farg‘ona shahar Kengashining navbatdan tashqari sessiyasi bo‘lib o‘tgan. Unda tashkiliy masala ko‘rilib, Mirzohid Murodilovich Ubaydullayev Farg‘ona shahar hokimi etib tayinlangan.
Mirzohid Ubaydullayev 2020-yilning 4-aprelidan ushbu tayinlovga qadar viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i vazifasida faoliyat yuritgan. Undan avval esa Marg‘ilon shahriga hokimlik qilgan.
Eslatib o‘tamiz, Farg‘ona shahrining to‘rtta sektor rahbari — hokimi, prokurori, IIB boshlig‘i va tuman soliq inspeksiyasi rahbari O‘zbekiston Prezidenti Shavkat Mirziyoyevning Farg‘ona viloyatiga tashrifi davomida lavozimidan ozod etilgan edi.
Izoh (0)