Farg‘onada tibbiyot birlashmalariga ishga kiritib qo‘yish orqali pul ishlash bilan shug‘ullanib kelgan tibbiyot xodimlari qo‘lga olindi. Bu haqda Zo‘r TV telekanalining “Bu kun” dasturida so‘z boradi.
Ma’lum qilinishicha, Farg‘ona shahar tibbiyot birlashmasida ishlovchi kichik tibbiyot xodim bir fuqaroni shifoxonaning jonlantirish bo‘limiga hamshira vazifasiga ishga kiritib qo‘yishini aytib, undan 800 AQSh dollarini olayotgan vaqtda qo‘lga olingan.
Gumonlanuvchining so‘zlariga ko‘ra, u bunga qadar Tibbiyot birlashmasining jonlantirish bo‘limida ishlab keladigan ayol orqali 3 nafar fuqaroni ham shu tariqa ishga joylagan va buning evaziga ularning har biridan o‘zi uchun 100 dollardan pul olgan.
Shuningdek, tezkor tadbir davomida Farg‘ona shahar tibbiyot birlashmasi tasarrufidagi markaziy shifoxona hududida qurilayotgan 150 o‘ringa mo‘ljallangan yangi tug‘ruq kompleksi foydalanishga topshirilganidan so‘ng tibbiyot xodimi sifatida ishga joylashishlariga yordam berishlarini aytib, 10 nafar fuqarodan 5700 AQSh dollari olgan shaxslar ham qo‘lga olingan.
Avvalroq Sirdaryoda tibbiyot birlashmasiga ishga kiritib qo‘yish evaziga fuqarolardan jami 400 dollar olgan shaxslar ushlangani, Ohangaron hamshiradan 200 dollar pora talab qilgan shahar tibbiyot birlashmasi boshlig‘i qo‘lga olingani to‘g‘risida xabar berilgandi.
Izoh (0)