Фарғонада тиббиёт бирлашмаларига ишга киритиб қўйиш орқали пул ишлаш билан шуғулланиб келган тиббиёт ходимлари қўлга олинди. Бу ҳақда Zo‘r TV телеканалининг «Бу кун» дастурида сўз боради.
Маълум қилинишича, Фарғона шаҳар тиббиёт бирлашмасида ишловчи кичик тиббиёт ходим бир фуқарони шифохонанинг жонлантириш бўлимига ҳамшира вазифасига ишга киритиб қўйишини айтиб, ундан 800 АҚШ долларини олаётган вақтда қўлга олинган.
Гумонланувчининг сўзларига кўра, у бунга қадар Тиббиёт бирлашмасининг жонлантириш бўлимида ишлаб келадиган аёл орқали 3 нафар фуқарони ҳам шу тариқа ишга жойлаган ва бунинг эвазига уларнинг ҳар биридан ўзи учун 100 доллардан пул олган.
Шунингдек, тезкор тадбир давомида Фарғона шаҳар тиббиёт бирлашмаси тасарруфидаги марказий шифохона ҳудудида қурилаётган 150 ўринга мўлжалланган янги туғруқ комплекси фойдаланишга топширилганидан сўнг тиббиёт ходими сифатида ишга жойлашишларига ёрдам беришларини айтиб, 10 нафар фуқародан 5700 АҚШ доллари олган шахслар ҳам қўлга олинган.
Аввалроқ Сирдарёда тиббиёт бирлашмасига ишга киритиб қўйиш эвазига фуқаролардан жами 400 доллар олган шахслар ушлангани, Оҳангарон ҳамширадан 200 доллар пора талаб қилган шаҳар тиббиёт бирлашмаси бошлиғи қўлга олингани тўғрисида хабар берилганди.
Изоҳ (0)