Zangiotada fermer xo‘jaligiga qarashli yerni 27,7 ming dollarga sotmoqchi bo‘lgan shaxs ushlandi

Toshkent viloyati Zangiota tumanida sug‘oriladigan yer maydonini noqonuniy sotmoqchi bo‘lgan firibgar qo‘lga olindi. Bu haqda Bosh prokuratura “Daryo”ga ma’lum qildi.

Ma’lumotlarga ko‘ra, Zangiota tumanida “N.” nomli MTP rahbari G‘. ismli fuqaroga tumandagi chorva fermer xo‘jaligiga qarashli 30 sotix sug‘oriladigan yer maydonini sotmoqchi bo‘lgan. Buning evaziga u fuqaro G‘.dan 27,7 ming dollar so‘ragan.

Firibgar yer hujjatlarini tanishlari orqali rasmiylashtirib berishga kelishib, oldindan 10,3 ming dollarni olgan vaqtida ashyoviy dalil bilan ushlangan.

Holat yuzasidan unga nisbatan Jinoyat kodeksining tegishli moddasi bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Sirdaryoda 12 sotix yerni rasmiylashtirib berish uchun 1200 dollar talab qilgan qurilish bo‘limi boshlig‘i va uning o‘rtada vositachilik qilgan sherigi ushlangani, Bo‘stonliqdagi 1 gektar yerni rasmiylashtirib berish uchun 160 ming dollar talab qilgan shaxs qo‘lga olingani, Toshkent viloyatida 60 ming dollarga yer sotmoqchi bo‘lgan tuman hokimi o‘rinbosari ushlangani to‘g‘risida xabar berilgandi.