Toshkent viloyatining Chirchiq shahrida IKEA kompaniyasining innovatsion mebel ishlab chiqarish fabrikasini qurish rejalashtirilmoqda. “Gazeta.uz”ning xabar berishicha, bu haqda 8-fevral kuni Shavkat Mirziyoyevga namoyish etilgan investitsiya loyihalari taqdimotida ma’lum bo‘lgan.
Loyihani Toshkent viloyati hokimi vazifasini bajaruvchi etib tayinlangan Davron Hidoyatov namoyish etgan.
Ma’lum qilinishicha, loyiha hujjatida mebel ishlab chiqarish fabrikasini qurish tashabbuskori sifatida IKEA MChJ ko‘rsatilgan. Korxonaning ishlab chiqarish quvvati 17 million dollarga teng 3,2 ming dona mebelni tashkil etadi. Loyihaning umumiy qiymati 52 million dollarga baholangan bo‘lib, 10 million dollar loyiha tashabbuskorining o‘z hisobidan, qolgan 42 million dollar esa xorijiy investitsiya evaziga moliyalashtiriladi.
Mebel ishlab chiqarish fabrikasi ishga tushgach, 320 ta yangi ish o‘rni yaratilishi kutilmoqda. Ushbu loyihani amalga oshirish uchun 5,5 gektar yer maydoni ajratilishi so‘ralgan bo‘lib, u 22 oy ichida amalga oshiriladi.
Avvalroq Toshkent viloyatida 2021-yilda 355 ta loyiha ishga tushirilishi haqida xabar berilgan edi. Umumiy qiymati 1 milliard 624 million dollar bo‘lgan mazkur loyihalarning 198 tasi sanoat, 81 tasi xizmat ko‘rsatish, 76 tasi qishloq xo‘jaligi sohasidadir.
IKEA — transmilliy korporatsiya bo‘lib, 1943-yilda Shvetsiyada 17 yoshli Ingvard Kamprad tomonidan tuzilgan. Kompaniya tez yig‘iladigan mebel, oshxona texnikasi va uy jihozlarini ishlab chiqaradi. Bosh ofis Niderlandiyada joylashgan. IKEA 2008-yildan beri dunyodagi eng yirik mebel sotuvchisi hisoblanadi. IKEAning ko‘plab do‘konlari INGKA xolding kompaniyasiga tegishli, kompaniya esa Stichting INGKA — dunyoning eng boy 40 ta fondlaridan biri tomonidan boshqariladi. Avgust oyining oxirida Ingka Group 50 dan ortiq mamlakatlarda 445 ta chakana savdo do‘konlariga ega edi.
Izoh (0)