Toshkent shahar hokimligida 8-fevral kuni 2021-yilda poytaxtda bunyodkorlik, ko‘kalamzorlashtirish va yo‘llarni ta’mirlash bo‘yicha amalga oshirilishi rejalashtirilgan ishlar yuzasidan matbuot anjumani o‘tkazildi. Tadbirda Toshkent shahar hokimining birinchi o‘rinbosari Baxtiyor Rahmonov 2021-yilda poytaxtda tashkil etiladigan veloyo‘laklar to‘g‘risida ma’lumot berdi, deya xabar qilmoqda “Daryo” muxbiri.
“Velosiped yo‘laklari qurish jarayoni ikki bosqichda amalga oshiriladi. Birinchisi, shahardagi har bir tumanning shohko‘chalarida bo‘lib, shu yil jami 42 kilometr uzunlikdagi yo‘lakchalar quriladi. Ikkinchisi esa Toshkent shahri markazida bo‘ladi”, — dedi Rahmonov.
Avvalroq Toshkent shahar Transport boshqarmasi fuqarolarga murojaat qilib velosiped yo‘laklari va velosheringlarni rivojlantirish borasidagi takliflari bilan bo‘lishishga chaqirgan edi.
Bosh vazir o‘rinbosari, Turizmni rivojlantirish davlat qo‘mitasi raisi Aziz Abduhakimov boshchiligidagi ishchi guruh Toshkent shahridagi veloyo‘lakchalarni ko‘zdan kechirgan va haydovchilarni o‘z mashinalarini veloyo‘lakchalarga qo‘ymaslikka chaqirgandi.
Eslatib o‘tamiz, Prezident farmoniga asosan 2021-yil 1-mayga qadar O‘zbekiston shaharlari va har bir tuman markazida piyoda va velosipedda yurish uchun “salomatlik yo‘laklari”, “velosiped yo‘laklari” quriladi.
Mazkur yo‘laklarning umumiy uzunligi 3–5 kilometr bo‘lib, o‘zaro uzviy bog‘liq bo‘ladi. Ularga energotejamkor, harakat sensorlari bilan jihozlangan yoritish tizimlari o‘rnatiladi. Yo‘laklar boshlanishi, oralig‘i va yakunini ko‘rsatuvchi yo‘l belgilari va yorug‘lik qaytaruvchilar bilan to‘liq ta’minlanadi. Bunda nogironligi bo‘lgan shaxslar uchun qulayliklar yaratilishi ko‘zda tutilgan.
Izoh (0)