Тошкент шаҳар ҳокимлигида 8 февраль куни 2021 йилда пойтахтда бунёдкорлик, кўкаламзорлаштириш ва йўлларни таъмирлаш бўйича амалга оширилиши режалаштирилган ишлар юзасидан матбуот анжумани ўтказилди. Тадбирда Тошкент шаҳар ҳокимининг биринчи ўринбосари Бахтиёр Раҳмонов 2021 йилда пойтахтда ташкил этиладиган велойўлаклар тўғрисида маълумот берди, дея хабар қилмоқда «Дарё» мухбири.
«Велосипед йўлаклари қуриш жараёни икки босқичда амалга оширилади. Биринчиси, шаҳардаги ҳар бир туманнинг шоҳкўчаларида бўлиб, шу йил жами 42 километр узунликдаги йўлакчалар қурилади. Иккинчиси эса Тошкент шаҳри марказида бўлади», — деди Раҳмонов.
Аввалроқ Тошкент шаҳар Транспорт бошқармаси фуқароларга мурожаат қилиб велосипед йўлаклари ва велошерингларни ривожлантириш борасидаги таклифлари билан бўлишишга чақирган эди.
Бош вазир ўринбосари, Туризмни ривожлантириш давлат қўмитаси раиси Азиз Абдуҳакимов бошчилигидаги ишчи гуруҳ Тошкент шаҳридаги велойўлакчаларни кўздан кечирган ва ҳайдовчиларни ўз машиналарини велойўлакчаларга қўймасликка чақирганди.
Эслатиб ўтамиз, Президент фармонига асосан 2021 йил 1 майга қадар Ўзбекистон шаҳарлари ва ҳар бир туман марказида пиёда ва велосипедда юриш учун «саломатлик йўлаклари», «велосипед йўлаклари» қурилади.
Мазкур йўлакларнинг умумий узунлиги 3–5 километр бўлиб, ўзаро узвий боғлиқ бўлади. Уларга энерготежамкор, ҳаракат сенсорлари билан жиҳозланган ёритиш тизимлари ўрнатилади. Йўлаклар бошланиши, оралиғи ва якунини кўрсатувчи йўл белгилари ва ёруғлик қайтарувчилар билан тўлиқ таъминланади. Бунда ногиронлиги бўлган шахслар учун қулайликлар яратилиши кўзда тутилган.
Изоҳ (0)