Toshkent shahar Transport boshqarmasi fuqarolarga murojaat qilib velosiped yo‘laklari va velosheringlarni rivojlantirish borasidagi takliflari bilan bo‘lishishga chaqirdi. Takliflar aholi uchun mazkur xizmatlarning sifati va maksimal darajada foydasini ta’minlash uchun zarur bo‘lib, ularni toshkent@mintrans.uz pochtasiga yuborish mumkin.

Foto: “Daryo”

Eslatib o‘tamiz, Vazirlar Mahkamasining 2020-yil 29-dekabrdagi 812-sonli “Avtotransport vositalarini yollash va ijaraga berish faoliyatini qo‘llab-quvvatlash, elektromobillar va mototransportlardan foydalanish, shuningdek, velosipedda mamlakat bo‘ylab harakatlanishni rivojlantirishga oid qo‘shimcha chora-tadbirlar to‘g‘risida”gi qaroriga asosan Toshkent shahrida velosiped uchun alohida yo‘laklar hamda veloshering xizmatini yo‘lga qo‘yish rejalashtirilgan.

Vazirlikka 1-fevralga qadar O‘zbekistonda velotransportni rivojlantirish bo‘yicha kompleks tadbirlar dasturi loyihasini ishlab chiqish topshirilgan.

Dasturdan quyidagi bandlar o‘rin olishi kerak:

  • velosipedda va boshqa shaxsiy vositalarda harakatlanish imkonini beruvchi to‘siqsiz va xavfsiz muhitni (tartibga solinadigan va solinmaydigan yo‘l kesishmalari, Yo‘l harakati qoidalariga zarur o‘zgartirish va qo‘shimchalar kiritish, veloyo‘lkalar, veloyo‘llar, veloshosse, svetoforlar, yo‘l belgilari, velosipedlarni to‘xtatib qo‘yish joylari, velosipedlarni saqlash uchun ishonchli sharoitlar va boshqalar), shu jumladan, davlat-xususiy sheriklik mexanizmlari orqali yaratish;
  • turistik shaharlar, dam olish zonalari, qo‘riqxonalar va mamlakatimizning boshqa madaniy meros obyektlarini bog‘lovchi velosipedlar magistrallari milliy tarmog‘ini bosqichma-bosqich barpo etish;
  • shaharlar va hududlarni velosipedlashtirish bo‘yicha ko‘rilayotgan chora-tadbirlar samaradorligini baholash va ularni har yili monitoring qilish uchun mezonlar (indikatorlar) joriy etish (bir yilda velosipedlar ishtirokida yuz bergan yo‘l-transport hodisalari soni, aholining muayyan soniga nisbatan velosipedchilar soni, toifalar bo‘yicha velosiped yo‘lkalari, velochorrahalar, velosiped qo‘yish joylari va ulardagi to‘xtab turish joylari);
  • velosipedda harakatlanish, velosiped transporti va shaxsiy harakatlanish vositalarining inson salomatligini mustahkamlovchi transport turi, shuningdek, ekologik toza harakatlanish vositasi sifatida ommalashtirish va targ‘ib qilish;
  • velosipedda harakatlanishni, shu jumladan, velosipedlar va ularning butlovchi buyumlarini xarid qilishda davlat tomonidan qo‘llab-quvvatlash;
  • aholida velosipedchilik madaniyatini shakllantirish;
  • Butunjahon velosiped kuni va Yevropa harakat haftaligiga bag‘ishlangan yirik velomarafonlar, velosipedda yo‘l bosib o‘tish va boshqa tadbirlarni o‘tkazish.

Qaror bilan O‘zbekiston Fransiyadagi elchisi Sardor Rustamboyevga ishlab chiquvchilarga velosiped transporti va veloinfratuzilmani, ayniqsa, koronavirus pandemiyasi davrida rivojlantirish bo‘yicha fransuz tajribasi bilan tanishishda ko‘maklashish vazifasi qo‘yilgan.

Bundan tashqari, elchi “fransuz hukumati bilan O‘zbekistonda velosiped transporti va veloinfratuzilmasini, shu jumladan, velosiped ishlab chiqaruvchilarni va ushbu sohada xizmat ko‘rsatuvchi boshqa kompaniyalarni jalb qilish orqali rivojlantirish borasida ikki tomonlama yaqin biznes va ishchi aloqalarini o‘rnatish masalasini ko‘rib chiqishi kerak”.

Ichki ishlar va Sog‘liqni saqlash vazirliklariga oilaviy poliklinikalar hamda profilaktika inspektorlarini velosipedlar bilan jihozlash choralarini ko‘rish topshirilgan.

Shuningdek, Transport vazirligiga manfaatdor vazirliklar va idoralar bilan birgalikda ikki oy muddatda yengil avtomobillar va mototransport vositalarini qisqa muddatli ijaraga berish tartibi to‘g‘risidagi yangilangan nizom loyihasi hamda normativ-huquqiy hujjatlarga o‘zgartirish va qo‘shimchalar kiritish to‘g‘risida takliflarni kiritish vazifasi qo‘yilgan.

Eslatib o‘tamiz, Prezident Shavkat Mirziyoyev 2020-yil dekabr oxirida Oliy Majlisga yo‘llagan murojaatnomasida O‘zbekistonning barcha tuman markazlari va shaharlarda piyodalar va velosiped yo‘laklari barpo etilishini ma’lum qilgandi.