Farg‘ona viloyatining So‘x tumanida aerodrom qurilishi boshlandi. Ishlarni 2021-yilning mayiga qadar yakunlash rejalashtirilgan, deb xabar beradi “Farg‘ona xalqaro aeroporti” MChJ matbuot xizmati.
“Mazkur aerodrom qurilishi uchun tumanning “Novobod” MFY hududidan ja’mi 4,5 gektar yer maydoni ajratilgan bo‘lib, uchish va qo‘nish maydonchasining uzunligi 650 metr va eni 100 metrni tashkil etadi. Loyiha qiymati 12 milliard so‘mdan iborat. Qurilish ishlarini may oyiga qadar yakuniga yetkazish rejalashtirilgan”, — deyiladi xabarda.
Ma’lumot uchun, O‘zbekiston Prezidentining “So‘x tumanini 2020–2021-yillarda ijtimoiy-iqtisodiy jihatdan rivojlantirish chora-tadbirlari to‘g‘risida”gi qarorida So‘x tumanida aerodrom qurish vazifasi topshirilgan edi. Parvozlar uchun “An” samolyotlari va “Mi-8” vertolyotlaridan foydalanish rejalashtirilgan.
Eslatib o‘tamiz, O‘zbekiston—Qirg‘iziston chegarasida joylashgan Chashma bulog‘i oldida 2020-yil 31-may kuni ikki mamlakat fuqarolari o‘rtasida ziddiyat kelib chiqqan. O‘zbekiston bosh vaziri Abdulla Aripov 1-iyun kuni voqea yuz bergan joyga tashrif buyurdi va aholi bilan uchrashdi. Shuningdek, Abdulla Aripov Qirg‘iziston rasmiylari bilan uchrashib, hodisa yuzasidan muzokara olib bordi. Shu kuni O‘zbekiston va Qirg‘iziston prezidentlari mazkur hodisani telefon orqali muhokama qildi. O‘zbekiston hukumati a’zolari hududdagi muammolarni o‘rganish uchun 2-iyun kuni u yerga tashrif buyurdi.
Mojaro oqibatida 187 nafar o‘zbekistonlik kasalxonaga yotqizilgan, O‘zbekiston tomonda uchta xonadon yonib ketgan. Qirg‘izistonning Botken viloyatida esa uy va omborxona yonib ketgan, shuningdek, 25 kishi jarohat olgan. Bundan tashqari, bosh vazir Abdulla Aripov bilan bo‘lib o‘tgan uchrashuvda so‘xliklar viloyat hokimi Shuhrat G‘aniyevdan norozi ekanligini ham bildirgandi.
Izoh (0)