Yer olib berishni va’da qilib pora bilan qo‘lga tushgan Marhamat tumani hokimining sobiq yordamchisi yetti yilga ozodlikdan mahrum qilindi

Pora olish va berishda ishtirok etgan Marhamat tumani hokimining sobiq yordamchisi hamda uning sheriklari ozodlikdan mahrum etildi. Bu haqda O‘zbekiston Oliy sudi matbuot xizmati “Daryo”ga ma’lum qildi.

Eslatib o‘tamiz, O‘zbekiston Prezidenti huzurida 15-oktabr kuni o‘tkazilgan yig‘ilishda Andijon viloyati Marhamat tumani hokimi yordamchisi U.A. sentabr oyida yaqin aloqalari orqali Marhamat tumani hududidan 11 gektar yer maydoni ajratish uchun jami 29 ming dollar miqdoridagi noqonuniy pulni olayotgan vaqtda jinoyat ustida ushlangani aytib o‘tilgan edi.  Andijon viloyati prokuraturasi Marhamat tumani hokimi yordamchisining 29 ming dollar pora olish holati uch qismdan iborat ekanligini ma’lum qilgandi.

Ishni ko‘rib chiqqan jinoyat ishlari bo‘yicha Andijon tuman sudi Marhamat tumani hokimining sobiq yordamchisi U.A. Jinoyat kodeksining 25 (jinoyatga tayyorgarlik ko‘rish va jinoyat sodir etishga suiqasd qilish), 168-moddasi (firibgarlik) 4-qismining «a» (juda ko‘p miqdorda) bandi va 28,211-moddasi (pora berish) 3-qismining «a» (juda ko‘p miqdorda) bandida nazarda tutilgan jinoyatlarni sodir etganlikda aybli deb topilgan. Unga tayinlangan jazolar qisman qo‘shilib, uzil kesil 2 yil muddatga davlat organlarida ishlash huquqidan mahrum qilinib, 7 yil 3 oy ozodlikdan mahrum qilish jazosi tayinlagan.

Pora berish va olishda ishtirok etgan fuqaro M.A. 5 yilga, fuqaro T.Z. 6 yil-u 1 oyga, fuqaro Yu.I.ga esa 4 yil ozodlikdan mahrum qilish jazosi tayinlangan. Fuqaro N.X.ga tayinlangan jazolar qisman qo‘shilib, uzil-kesil bazaviy hisoblash miqdorining 51 baravari miqdorida (11 million 373 ming so‘m) jarima jazosi tayinlangan.

Ma’lumot uchun, Prezident raisligida o‘tkazilgan yig‘ilishda Toshkent shahar hokimligi qoshidagi kapital qurilish bosh boshqarmasi boshlig‘i o‘rinbosari, Chilonzor tumanidagi investitsiyalar va tashqi savdo bo‘limi boshlig‘i, Qibray, Chilonzor, Buvayda, Oqqo‘rg‘on, Bo‘stonliq tumani hokimining o‘rinbosari yer maydonini sotayotgan vaqtida jinoyat ustida qo‘lga olingani aytib o‘tilgan.