Shavkat Mirziyoyev 8-fevral, dushanba kuni Andijon va Toshkent viloyatlaridagi investitsiya loyihalari taqdimoti bilan tanishdi, deya xabar bermoqda Prezident matbuot xizmati.
Dastlab 2021-yilda ishga tushiriladigan loyihalar haqida axborot berildi. Xususan, Andijon viloyatida umumiy qiymati 1 milliard 433 million dollar bo‘lgan 616 ta loyiha foydalanishga topshiriladi. Sohalar kesimida aytganda, ularning 258 tasi — sanoat, 185 tasi — xizmat ko‘rsatish, 173 tasi — qishloq xo‘jaligi tarmoqlarida.
Bularning natijasida qariyb 10 trillion so‘mlik ishlab chiqarish quvvati tashkil etilib, 95 million dollarlik import o‘rnini bosish hamda 265 million dollarlik eksport imkoniyati yaratiladi. 61 mingta yangi ish o‘rni ochiladi.
Xususan, “Tetrateks” mas’uliyati cheklangan jamiyati tomonidan Baliqchi tumanida to‘qimachilik kompleksi tashkil qilinmoqda. 2021—2022-yillarda to‘rt bosqichda amalga oshirilishi rejalashtirilgan ushbu loyihaning jami qiymati 126 million yevro. Korxona ip-kalavadan boshlab tayyor trikotaj mahsulotlarigacha bo‘lgan jarayonlarni qamrab oladi. 2021-yil oxirida ishga tushiriladigan birinchi bosqichda 2 ming 500 ta, barcha bosqichlar yakunida esa 10 mingta ish o‘rni yaratiladi.
Bu kabi loyihalar bo‘yicha jadal ish olib borish bilan birga yangilari ham shakllantirilmoqda. Masalan, Andijon viloyatida umumiy qiymati 782 million dollar bo‘lgan 53 ta yangi investitsiya loyihasi ishlab chiqildi.
Taqdimotda ushbu loyihalarning istiqbollari, moliyalashtirish manbalari va infratuzilma masalalari yuzasidan ma’lumot berildi.
Davlat rahbari loyihalarni ish o‘rinlariga talab yuqori bo‘lgan mahallalarda joylashtirish, davlat-xususiy sheriklik asosidagi korxonalarni ko‘paytirib, bandlikni oshirish muhimligini ta’kidladi.
Toshkent viloyatida 2021-yil 355 ta loyiha ishga tushiriladi. Umumiy qiymati 1 milliard 624 million dollar bo‘lgan mazkur loyihalarning 198 tasi sanoat, 81 tasi xizmat ko‘rsatish, 76 tasi qishloq xo‘jaligi sohasidadir. Bularning samarasida qariyb 35 milliard so‘mlik ishlab chiqarish quvvati yaratilib, 13 ming kishining bandligi ta’minlanadi. 48 million dollarlik import o‘rnini bosuvchi va 42 million dollarlik eksportbop mahsulot ishlab chiqariladi.
Bundan tashqari, viloyatda 187 ta yangi investitsiya loyihasi rejalashtirilmoqda. Taqdimotda ularning eng yiriklari to‘g‘risida to‘xtalib o‘tildi.
Masalan, “Metal produkt” mas’uliyati cheklangan jamiyati tomonidan 25 million dollar evaziga Ohangaron shahrida metall mahsulotlari ishlab chiqarish yo‘lga qo‘yilmoqda. Uning quvvati yiliga 60 ming tonna bo‘ladi. 2021-yil may oyida foydalanishga topshirilishi rejalashtirilgan korxonada 150 kishi ish bilan ta’minlanadi.
“Angren” erkin iqtisodiy zonasida velosipedlar, Qibray tumanida oziq-ovqat mahsulotlari ishlab chiqarish loyihalari ham ichki bozor uchun juda muhim.
Prezident sanoatga ilm va innovatsiyalarni faol jalb etish, mahsulotlar sifatiga alohida e’tibor qaratib, xaridorgirligini ta’minlash zarurligini ta’kidladi. Toshkent viloyatining transport va turizm salohiyatidan oqilona foydalanib, xizmat ko‘rsatishni rivojlantirish bo‘yicha ko‘rsatmalar berildi.
Bundan avval Shavkat Mirziyoyev Avtomobil yo‘llari qo‘mitasi rahbariga yo‘llar sifati bo‘yicha tanbeh bergani, ichki yo‘llarni arzon qurish texnologiyasini ko‘zdan kechirgani hamda Prezidentning Farg‘ona shahridagi “Shodiyona” mahallasida mahalliy aholi bilan uchrashuvi haqida xabar berilgandi.
Izoh (0)