Ijtimoiy tarmoqlarda boshpanasiz hayvonlar yashashi uchun “Gavcheg” nomli makon yaratgan Sergey Rusnakning kaltaklangani to‘g‘risida xabarlar tarqaldi. “Mehr va oqibat” hayvonlarni himoya qilish jamiyati vakillari sodir bo‘lgan voqeaga oydinlik kiritgan.
“Men boshpanasiz hayvonlarni tutib ketadiganlarni chaqirgan va itlarni otib tashlanishiga rozi bo‘lgan ayol bilan kelishib olishni xohladim. Unga oziq-ovqat mahsulotlari borasida tez-tez yordam berib turardim, uning uyidagi hayvonlarni davolaganman, ovqatlantirganman. Muammo bo‘lmaydi deb o‘yladim. Biroq uning men oldin hech ko‘rmagan jiyani chiqdi. Boshimga urdi va men hushimni yo‘qotdim. Keyin esa kaltakladi — bu haqda menga qo‘shnilarim aytdi”, — deydi Sergey Rusnak.
Aniqlanishicha, o‘sha kuni boshpanasiz hayvonlarni tutish bilan shug‘ullanuvchi xizmat xodimlari chaqiruv bo‘yicha manzilga kelgan va ayolga itlarni orqasidan quvib yurmasliklarini, ularni otib o‘ldirishlarini bildirgan, biroq buning uchun uchastka nozirining ruxsati kerak bo‘lgan.
Mazkur xizmat xodimlari chaqirilganidan xabar topgan Sergey qo‘shni ayol bilan kelishishga uringan. Guvohlarning so‘zlariga ko‘ra, u uyga yaqinlashganida ayolning O‘rtasaroy posyolkasidagi 44-sonli maktabning 11-sinfda o‘qiydigan jiyani erkakning boshiga g‘isht bilan urgan va hushsiz yotganida kaltaklay boshlagan.
Oradan biroz vaqt o‘tgach, hodisa joyiga Sergeyning sobiq turmush o‘rtog‘i Oksana Rusnak yetib kelgan va erkakni shifoxonaga olib borgan. U yerda jabrlanuvchiga tos suyagi sinishi va miya chayqalishi tashxisi qo‘yilgan.
“Shifoxonaga militsiya xodimlari kelib, ariza oldi, qo‘ng‘iroq qildi — savollar berdi. Aftidan, hozirda anavi yigitchani qidirishmoqda. O‘sha voqeadan so‘ng, u na uyida va na maktabda ko‘rinish bergan”, — deydi jabrlanuvchi.
Izoh (0)