Surxondaryolik bloger Otabek Sattoriy tovlamachilikda ayblanib hibsga olingani haqida xabar berilgan edi. Ushbu blogerga qo‘yilgan ayblov o‘zgartirilmadi va prokuraturaning blogerga nisbatan qamoqqa olish ehtiyot chorasi ko‘rilishi haqidagi iltimosnomasi qanoatlantirildi. Bu haqda Oliy sud xabar berdi.
Qayd etilishicha, 2021-yil 1-fevral kuni jinoyat ishlari bo‘yicha Termiz shahar sudining yopiq sud majlisida Jinoyat kodeksining 165-moddasi (tovlamachilik) 2-qismi “v” bandida nazarda tutilgan jinoyatni sodir etganlikda ayblanayotgan, ijtimoiy tarmoqlarda “bloger, faol fuqaro” deya tavsiflanayotgan O.S.ga nisbatan Termiz shahar prokuraturasining qamoqqa olish tarzidagi ehtiyot chorasini qo‘llash to‘g‘risidagi iltimosnomasi sud tomonidan ko‘rib chiqilib, qanoatlantirildi.
Ma’lumot uchun, Jinoyat-protsessual kodeksining 242-moddasi (qamoqqa olish) talabiga muvofiq ehtiyot chorasi sifatida qamoqqa olish Jinoyat kodeksida uch yildan ortiq muddatga ozodlikdan mahrum qilish tariqasidagi jazo nazarda tutilgan qasddan sodir etilgan jinoyatlarga doir hamda ehtiyotsizlik oqibatida sodir etilib, buning uchun Jinoyat kodeksida besh yildan ortiq muddatga ozodlikdan mahrum qilish tariqasidagi jazo nazarda tutilgan jinoyatlarga doir ishlar bo‘yicha qo‘llaniladi.
Jinoyat-protsessual kodeksining 243-moddasiga (qamoqqa olish yoki uy qamog‘i tarzidagi ehtiyot chorasini qo‘llash tartibi) asosan qamoqqa olish yoki uy qamog‘i tarzidagi ehtiyot chorasini qo‘llash to‘g‘risidagi iltimosnoma yopiq sud majlisida ko‘rib chiqiladi.
Surxondaryo viloyat sudi jinoyat ishlari bo‘yicha apellyatsiya sudlov hay’atining 2021-yil 5-fevraldagi ajrimi bilan jinoyat ishlari bo‘yicha Termiz shahar sudining 2021-yil 1-fevraldagi ajrimi o‘zgarishsiz qoldirilgan.
Bundan avval deputat Rasul Kusherbayev blogerning qo‘lga olinishiga o‘z munosabatini bildirib, bu holatni “amaldorlarni tanqid qilayotgan bitta blogerga emas, butun boshli so‘z erkinligiga, Prezidentning ochiqlik siyosatiga qarshi surxondaryolik amaldorlarning isyonidir” deb tariflagan edi.
Izoh (0)