Qo‘shma Shtatlarda COVID-19’ga chalinish holati va uning oqibatida kasalxonaga yotqizilayotganlar soni kamaymoqda. Bu haqda AQSh kasalliklarni nazorat qilish markazi (CDC) rahbari Roshel Valenskining ma’lumotiga asoslanib “Interfaks” xabar berdi.
“Ayni paytda biz kasallik izchil pasayib borayotgan yo‘ldamiz”,— dedi Valenski.
Koronavirus infeksiyasiga chalinish bo‘yicha kunlik eng yuqori ko‘rsatkich 8-yanvar kuni qayd etilgandi, ammo keyinchalik mazkur ko‘rsatkich 13,4 foizga kamaydi, deyiladi xabarda. 26 yanvar—1 fevral kunlari mamlakatda kuniga o‘rtacha 144 mingta yangi holat aniqlandi.
Qurbonlar soni ko‘payishda davom etsa-da, o‘lim darajasi sekinlashmoqda. “Yaqin kunlarda kuzatilayotgan kasalxonaga yotqizilayotganlar sonining kamayishi kelgusi haftalarda o‘lim sonining ham qisqarishiga umid bermoqda”, — dedi Valenski.
Qo‘shma Shtatlar koronavirus yuqtirganlar va kasallik qurbonlari sonining ko‘pligi bo‘yicha dunyoda birinchi o‘rinda bormoqda. Pandemiya boshlanganidan beri mamlakatda 27 milliondan ortiq COVID-19’ga chalinish holati aniqlanagan, 457 mingdan ortiq bemor vafot etgan.
Eslatib o‘tamiz, sobiq prezident Donald Tramp AQShda koronavirus bilan bog‘liq vaziyatga doir ma’lumotlar haddan tashqari bo‘rttirilgan, bunga kasallanganlar va vafot etganlar sonini hisoblash bo‘yicha CDC qo‘llayotgan usul sababchi, deya ta’kidlagandi.
Oq uy esa koronavirusning “amerikacha” shtammi paydo bo‘lgan bo‘lishi mumkinligini ma’lum qilgan.
Izoh (0)