Ухань вирусология институтининг лабораторияси шу қадар мукаммал қурилганки, у ердан коронавирус сизиб чиқишини тасаввур қилиш қийин. Бу ҳақда Жаҳон соғлиқни сақлаш ташкилоти (ЖССТ)нинг Россиядаги гуруҳи аъзоси, Пастер номидаги Санкт-Петербург эпидемиология ва микробиология илмий-тадқиқот институти директори ўринбосари Владимир Дедковнинг баёнотига асосланиб «РБК» ёзмоқда.
Коронавирус инфекциясининг пайдо бўлиш сабабларини ўрганаётган ЖССТ экспертлари 3 январь куни Ухань вирусология институтига ташриф буюрди. Аввалроқ мутахассислар Хуанань денгиз маҳсулотлари бозорига ва шаҳардаги энг катта гўшт маҳсулотлари сотиладиган Байшачжоу бозорига борган эди. Унгача улар Ухандаги беморларни биринчилардан бўлиб даволаган иккита касалхонада бўлган.
«Бизнинг миссиямиз учун, албатта, ушбу муассасага ташриф буюриш, ҳамкасблар билан мулоқот қилиш, у ердаги шароит қандай ташкил этилганлигини кўриш жуда муҳим эди. Уларни ким танқид қилганини билмайман, аммо лаборатория мақтовга лойиқ даражада қурилган. Мен у ердан бирор касаллик тарқалишини хаёлимга сиғдиролмайман»,— деди Дедков.
Унинг сўзларига кўра, гипотеза жиҳатидан ҳамма нарса содир бўлиши мумкин, аммо коронавируснинг Ухань лабораториясидан тарқалиши ҳақида ҳеч қандай далиллар йўқ, вирус пайдо бўлишига олиб келадиган зарурат ҳам бўлмаган. Дедков, шунингдек, Ухань шаҳридаги денгиз маҳсулотлари бозорида коронавирус инфекциясининг пайдо бўлиши учун барча шароитлар мавжудлигини таъкидлади, чунки у санитария қоидалари нуқтаи назаридан талабларга умуман жавоб бермайди.
«Ҳамма нарса зич, бозор кичкина ва ниҳоятда гавжум. Ҳар қандай инфекция тарқалиши санитария меъёрларига риоя қилинмаслигидан келиб чиқади. Коронавирус ҳам шу тарзда пайдо бўлганми ёки йўқ, буни билмаймиз, аммо сабаб фақат шунда бўлса, жуда яхши бўларди.» — дея таъкидлади мутахассис.
Январь ойи бошида АҚШ президентининг Миллий хавфсизлик масалалари бўйича маслаҳатчиси ўринбосари Мэттью Поттингер коронавирус инфекцияси катта эҳтимол билан Хитойнинг Ухань шаҳридаги лабораториядан сизиб чиққани ҳақида «тобора кўпайиб бораётган далиллар» борлигини айтган. Трампнинг ўзи олдинроқ бу ҳақда гапириб, бир неча бор ХХР раҳбариятини вирус тарқалиши ҳақидаги маълумотларни яширишда айблаган.
Изоҳ (0)