Farg‘onalik ota voyaga yetmagan farzandi uchun 120 mln so‘m aliment pulini oldindan to‘lab berdi

Farg‘ona viloyatining Beshariq tumanida yashovchi ota farzandi uchun 18 yoshga to‘lguniga qadar to‘lanishi kerak bo‘lgan aliment pulini avvaldan to‘lab berdi. Bu haqda “Daryo”ga MIB viloyat boshqarmasi ma’lum qildi.

Ma’lum bo‘lishicha, Fuqarolik ishlari bo‘yicha O‘zbekiston tumanlararo sudining ijro hujjatiga asosan qarzdor B.H.dan undiruvchi G.T. foydasiga voyaga yetmagan bir nafar farzandining moddiy ta’minoti uchun aliment undirish belgilangan. Qarzdor ota 2020-yilning dekabr oyiga qadar intizomli aliment to‘lovchi sifatida barcha to‘lovlarni oldindan to‘lab kelgan.

Qarzdor B.H. farzandining 18 yoshgacha bo‘lgan aliment pullarini sobiq turmush o‘rtog‘i bilan o‘zaro kelishgan holda oldindan to‘lab berishini aytib, MIBning Beshariq tuman bo‘limiga murojaat qilgan. Byuroning davlat ijrochisi tomonidan hisoblab berilgan 120 million so‘m aliment pullarini sobiq turmush o‘rtog‘i to‘liq olgandan so‘ng hujjatlar rasmiylashtirilib, ijro hujjati tamomlangan.