Buxoro viloyatida portlash sodir bo‘lgan ko‘p qavatli uyda tabiiy gaz bo‘yicha sinovlar tegishli idoralar ruxsatisiz amalga oshirilgani ma’lum bo‘ldi. Bu haqda “Hududgaz Buxoro” gaz ta’minoti filiali rahbari O‘ktam Abdiyev xabar berdi.
“Daryo” muxbiri bilan suhbatlashgan “Hududgaz Buxoro” gaz ta’minoti filiali rahbari O‘ktam Abdiyev yangi qurilayotgan ko‘p qavatli binoda o‘rnatilgan tabiiy gazdan foydalanishiga ruxsat berilmaganini aytdi.
“Avvalo, har bir hududni gazlashtirish uchun belgilangan texnik shartlar bo‘yicha me’yoriy loyiha hujjatlar tayyorlanadi. Mazkur manzil bo‘yicha ham texnik shartlar berilgan, loyiha hujjatlar tayyorlangan va shu asosida tabiiy gazga ulanish uchun qurilish-montaj ishlari olib borilgan. Gaz quvurlarini ulash ishlari yakunlangach esa qurilish korxonasi ‘Buxoro shahargaz’ ta’minotiga uni foydalanishga qabul qilish uchun texnik hujjatlar tayyorlashi lozim bo‘lgan. Bu jarayon sinov deb yuritiladi. Sinovga asosangina viloyat hududgaz xodimlari gazdan foydalanishga ruxsat beradi. Unga qadar xodimlar gaz quvurlari ishlashini, me’yoriy xavfsizlik, chidamlilik va mustahkamligini sinovdan o‘tkazadi. Afsuski, mazkur jarayonda ushbu amallar bajarilmagan. Ayni paytda ushbu masalaga ekspertlar muhokamasi orqali ham aniqlik kirityapmiz”, — dedi O‘ktam Abdiyev.
Mas’ulning aytishicha, dastlabki surishtiruvlardan so‘ng ko‘p qavatli uyda tabiiy gazdan foydalanishga ruxsat berilmagani aniqlangan.
Eslatib o‘tamiz, avvalroq Buxorodagi ko‘p qavatli uy portlashi oqibatida 12 kishi jarohatlangani, holat yuzasidan jinoiy ish qo‘zg‘atilgani xabar qilingandi.
Izoh (0)